Tetsür kiralongrar 2-i Nigeria nung 56 poksetdaktsü

Peisasa pokseta asütsü mulungteter tetsür kiralongrar anati pei temang nung alenokba bomb pokdakja, Nigeria northwest tsütsülen, Madagali jila nung lendong atalokdaktsüba sülen police ketdangsertemi lendong atalokdak bushisüngdang sentong agiba noksa nung angur. (Madagali, December 10)

Yola, December 10 (Agencies): Peisasa pokseta asütsütsü mulungtetba tetsür kaketshir anati pei temang nung alenokba bomb pokdakja, Nigeria northwest tsütsülen, Madagali jila nung lendong tesashi ka yashi, Hokolbar nü atalokdaktsüba osang ka sorkar ketdangsertemi tanü, Honibar nü metetdaktsüogo.
Tan lendong atalokdaktsüba atema telok shingaia tanü tashi nung tenüng agia metetdakja mali saka tan lendongjia Nigeria aser kidangsüa aliba linüktem nung lendong mapang shia atalokdakja, tensa mejungi kümdaktsür Boko Haram kiralongrar telok mapa asütsü akok ta police-i temulung malemba olen ka metetdaktsüogo.
“Madagali nung tentetba shishilembadak bomb lendong kanga sashia atalokdaktsüba sülen iba lendong nung nisung 56 poksetba aser nisung 57 shi yirutsüba osang tang tashi nung jangjaogo,” ta Madagali district sorkar nung mendenbuba, Yusuf Mohammed-i osang jangjashitsü.
“Tan lendong atalokdaktsür tetsür kiralongrar anati pei temang nung alenokba bomb kasa mapang nung pokdakja tan lendongji atalokdaktsüba osang jangjaogo,” ta anasa aliba Mubi jila nung tesep tentetba mitkar telok otongdar, Major Badare Akintoye-ia shisem.
Nigeria ajunga Islamist tamangba yimsü benshir linük kümdaktsütsü meranger Boko Haram teloki tan ama Nigeria nung tentetba shishilembadak, tekülem agidak aser refugee nisungtem jenoka aliba tesemtem aser kidangsüa aliba Cameroon aser Niger linük na nung lendong kanga sashia atalokdaktsüba osang bushiteta lir.
Par teloki Nigeria sorkar anema nokdaktsü tenzüker tanü tashi nung Nigeria nübur nisung 15,000 shi tepsetba aser nisung million 2 dak temai pei talikdak toktsütsüsüa jenjang bener arutsüba osanga jangjaogo.
Boko Haram telok meshimeshia samatsütsü nükjidong nung Nigeria sorkaria par mitkartem Boko Haram tesepti, Sambisa aremi yoka, par mitkar mapatong tenzükdaktsüogo.