Tetsür kiralongrar kati Nigeria nung nisung 15 poksetdaktsü

Damaturu, July 26 (Agencies): Peisasa pokseta asütsü mulungtetba tetsür kiralongrar kati la temang nung alenokba bomb ka Nigeria northeast tsütsü Dmaturu yimti nung tanü Deobar nü pokdakja lendong atalokdaktsüogo ta police-i metetdaktsü.
Dmaturu nung tentetba shishilembadak atalokdaktsüba lendong nung ishiba agi nisung 15 shi poksetba osang tang tashi nung jangjaogo ta parnoki ashi.
Tanep 9:30 ako meta bomb lendong atalokdaktsüba atema telok shingaia tang tashi nung tenüng agia metetdakja mali saka tanü lendongji Boko Haram ta ajaba Islamist kiralongrar telok mapa asütsü akok ta police-i temulung malemba olen ka metetdaktsüogo.
“Tanep atalokba bomb lendong nung nisung 15 tashi poksetba osang tang tashi nung jangjaogo. Ajisüaka, mozükidang tentetba tasümang ayudaki tasümangtem maneni bener aruba osang jangjaogo anungji, tan lendong nung nisung pokseta asüba osangji tang jangjaba den timba akümtsü akok,” ta Police otongdar, Toyin Gbadegasin-i ashi.
Paisa ashiba agi, tanep atalokba lendong nung ishiba agi nisung 50 shi yiruba osanga tang tashi nung jangja lir.
Peisasa pokseta asütsü mulungteter tanga kati pa temang nung alenokba bomb pokdakja Dmaturu yimti tezülen tentetba police checkpoint ka nung duty inyaker police ketdangser 3 tashi pokseta südaktsüba sülen anogo 6 süir külen Yobe state yimtiba, Dmaturu yimti nung tanü lendongji ataloker lir.
Tan July ita tetenzüklena peisasa pokseta asütsü mulungtetba tetsür kiralongrar kati Dmaturu yimti nungsa külemküja alir nisung 9 shi pokseta südaktsüba osang bushiteta lir.
Nigeria Islamist yimli ka kümdaktsütsü merangba Boko Haram teloki Nigeria anüdoklen aser Nigeria den kidangsüa aliba Chad, Niger aser Cameroon linüktem nung tanü amala lendong balala mapang shia atalokdakja aruba osang bushitetogo.