Tetsür nem kaketshisatsü agütsüba ajanga terenlok alitsü: Manisha

Pratapgarh, December 20 (Agencies): Tetsürtem nem kaketshisatsü agütsüba ajanga India ajunga nung terenlok alitsü ta Bollywood actress, Manisha Koirala-i metetdaktsüogo.
“Tetsür tashi ulutsütsü mapatong nung parnok nem kaketshisatsü agütsütsüji mezüngbuba shilem lir. Tetsürtemi kaketshisatsü meteta akümba ajanga dang parnoki lokti tentet nung tongti shilem agitettsü aser ibaji ajanga India linük ajunga nung terenlok alitsü,” ta lai ashi.
Uttar Pradesh kübok Pratapgarh yimti nung tentetba Kripalu Mahila Mahavidyalaya (JKP) kaket rejui ayongba 3 buba Annual Day sentong nung shilem agia o jembidang Manisha-i iba olen ya sangoktsü.
JKP-i nübur taküm jenjang tajungba kümdaktsütsü maparen inyakba den külemi, tetsürtem nem kaketshisatsü angati agi agütsür.
“India nung tetsür kaketshisatsü bushitsü jenjang tajungba akümtsü tenzükogo,” ta shia, peisasa pei dak temulung lemtetba tetsürtemi lokti aser linük renloktsü shilem nung tongti shilem agiteter ta Manisha-isa ashi.
“Yimdak yimtsüngtem nung alir tetsür chanutem nem angati agi kaketshisatsü agütsütsüji nübur tenzüktsü shilem nung tongti lir. Iba kaket reju nung azünger tetsürtemi takok tulu anguba atema kanga pelar,” ta Uttar Pradesh Religious Endowment Minister, Vijay Mishra-ia metetdaktsü.