Tetsür nem kechi koma shisaliok agutsür, ibaji metettsüla: Manipur Angh

Imphal, April 05 (Agencies): Manipur Angh, Najma Heptulla-i, tetsürtem nem kechi koma shisaliok ka agutsürar ibaji meteta alitsüla, ta ashi.
Expedition (XPD) 2470 Road trip 2017 tenzüktsüba sentong nung la tongti tesemdanger liasü.
Expedition (XPD) 2470 Road trip 2017 nung ya tetsürtem telok kati anogo 70 tsüngda linük 24 sema kilometer 24,000 ayimjemtsü, aser iba sentong tenzüktsüdang Heptulla-i, “Tanga linüktem nung tangara koma alir’ar ibaji metettsü atema alima sema senzütsü mapang ka lir,” ta ashi.
State Angh-isa Rotary Club-i mapa tajung inyakba atema tenüngsang agüja, “Rotary nungi tetsürtemi anogo 70 tsüngda linük 24 sema alima dang tetsürtem shisaliok indang osang sangdongtsü ta asübaji tesüngmangtsü ka lir,” ta ashi.
Tetsürtem nem shisaliok agutsütsü atema sangdongba ya Ato kilonser, Narendra Modi mapatong ‘Beti Bachao Beti Padhao’ scheme den sendaktepa lir, ta laisa shisem.
“Ajisüaka tetsür ka nem shisaliokji komaka agutsür, ibaji meteta alitsüji tongtibang,” ta laisa ashi.
“Asenoki tangar nem asenok indang metetdaktsütsüla. Asen sobaliba aser putiotsü atema asenoki nüma atangtsüla aser itemji wazüka ayutsüla. India nunger ka asüba atema asenoki nüma atangtsüla,” ta laisa metetdaktsü.