Tetsür nem shilem 25 agütsütsü mulunga lir : TR Zeliang

Meluri Town Council tenzükba nüngtem nung yangluba nüngshilung jakdang Chief Minister T R Zeliang, Minister Yitachu, Parliamentary Secretary R Tohanba, Pochury Hoho tir Penthu, DC Phek Murohu Chotso aser tangartem agiba noksa angur.

Meluri, April 2 (TYO) : Honibarnü Meluri Public Ground nung Nagaland Chief Minister, T R Zeliang-i Meluri Town Council tenzüktsüogo.
Iba sentong nung School Education & SCERT Minister, Yitachu, Municipal Affairs, Economics & Statistics Parliamentary Secretary, R Tohanba aser Pochury Hoho ketdangpurtem aden.
1972 nungi Meluri nung Adhoc Town Committee tenteter mapa inyaka aruba sülen full-fledged Town Council ka kümogo.
Nagaland nung Municipal Council asem – Kohima, Dimapur aser Mokokchung den town council 19 liasüba nung Aboi, Noklak aser Shamatore tem züngoka liasü aser tang Meluri Town Council ji Town Council 23 buba kümogo.
Naga Mothers Association (NMA)-i Municipal aser Town Councils nung tetsürtem atema shilem 33 mekazüka yutsütsü atema takhangba agüja Supreme Court nung ken o benokba ajanga Municipal aser Town Council elections magiteti arur, ta Zeliang-i tanü tongti tesemdanger o jembidang ashi.
“Yaküm Department of Municipal Affairs tentetba sülen NMA den iba ken o angatetteptsü atema jembitepa arudar. Taoba mapang sorkar aser NMA sendentem nung sorkari tetsür nem shilem 15 agütsütsü atema shidanga lir saka tangbo sorkari shilem 25 agütsütsü mulunga lir. Anungji, tetsürtemi shilem 25 ji mulunga agizüktsü mepishir. Iba ya takok ngua ora tetsür nem shilem 50 tashi lemzüktsütsü akok,” ta chief minister-isa ashi.
Tanü putu den apet teburtemia tangatetba melenshitsüla aser tetsürtem den külemi nübortem ajungkettsü atema mapa inyaktsü mepishir. Iba ken o okadak benoka aliba ajanga Centre-i ULBs atema sen crore 40 lemzüktsüba state sorkari magizükteter, ta TR Zeliang-isa shisem.
Iba sentong nung local MLA aser Minister, Yitachu-i o jembidang ashiba agi, full-fledged Town Council ka akümba denji tebilemtsü khuret tuluba dena lir.
Parliamentary Secretary, R Tohanba lenisüba kübok Municipal Affairs Department-i Meluri jila jenjang ajungketba nung temulung lemteta temelaba agütsüogo, aser tang iba jila nung alirtemi department-i aginüba ama mapa inyaka sayutsüla, ta Yitachu-isa ashi.
Sentong nung Tohanba-ia o tatsüka jembidang, sorkari Municipal Affairs Department den yaritepa Aboi dak alaka Noklak, Shamatore aser Meluri nung kintem aliba dak ajemdaker town council jenjang nung ajungket, ta metetdaktsü.
Tanü Chief Minister TR Zeliang-isa Town Council nüngshilung sayatsü aser nüngshilungji Pochury Baptist Church Council Executive Secretary, Rumatho-i meshiteta sarasadem.
Sentong nung mendenji Phek Deputy Commissioner, Murohu Chotso liasü, Baptist Church Meluri Town, Rev Tivishe-i sentong nung temoatsü meshia sarasadem aser St Xavier’s Pariah Meluri Parish Priest, Rev. Fr. Jose Lukose-i tenüngsang agüja tembang.
Sentong nung Vice Chairman Adhoc Town Council Meluri, Ghachu-i tesentepertem pela agizük aser Additional Deputy Commissioner Meluri, John Tsulise Sangtam-i anküp tepela o jembi.