Tetsür nem shilem lemzüktsüba magizüker: CNTC

Dimapur, November 20 (TYO): State sorkari Urban Local Bodies nung tetsür nem shilem 33 lemzüktsütsü telemtetba agiba magizüker kechiyong iba ya Arla 371 (A) nung lateta aliba Naga Customary Law anema lir, ta Central Nagaland Tribes Council (CNTC)-i sangdong ka nung metetdaktsü.
State sorkari nübortem asoshi bilemtsür aser nübortemi aginüba ama inyaktsü meranger süra, Nagaland nung tribal teloktemi ola adokba ya sorkari agizüktsüla. Tetsür-tebur kasa ta asüba tenüng amer, state sorkari nisung kar peladaktsütsü atema inyaker anungji iba telemtetba meyipa agitsüla, ta CNTC-i sangdong nung shia lir.
Naga nunger tetsürtem akhümtsübur aser libaliro ajak nung parnok nem tetushi agütsür. Anungji parnok nem shilem lemzüktsütsübaji tim masü. Akhidang nungi Naga nunger loktiliba nung tetsürtem temaba jenjang nung tushia arur aser parnoki wadang ajak nung tebur den tokteptsü temeten lir. Anungji, parnok nem shilem balaka lemzüktsüba ajanga Arla 371 A nung Naga nunger nem agüja aliba temetentem menentsür.
Public-i anema nokdakba ajanga tesüiba sorkari Nagaland Municipal Act, 2001 meyipa reprangshitsü atema Select Committee ka shim aser iba Select Committee, 2001 ji tang chief minister teinyakdak T.R. Zeliang lenisüba kübok liasü. Iba mapang pa parliamentary affairs minister inyaka liasü,
Select Committee-i reprangshimba osang nung ajemdaker September 22, 2012 nü Nagaland Legislative Assembly (NLA)-i Nagaland Municipal Act, 2001 nung PART IX A nungi Arla 243-T agientsü telemtetba agi.
Anungji, September 22, 2012 nü Assembly-i lemtetba ajanga tetsür nem shilem lemzüktsüba tashi agien. Ajisüaka, küm pezü shi lir külen, August 10, 2016 nü T.R. Zeliang-i aniba sorkari tesüiba telemtetba anema tetsür nem shilem 33 lemzüktsütsü atema cabinet telemtetba ka agi.
Iba ya September 22, 2012 nü NLA-i lemtetba den khenyongi meputep aser March 20, 2012 nü Legislative Assembly nung tetsür nem shilem lemzüktsütsü anema kanga sashia nokdakba Select Committee chairman, T.R. Zeliang-i kanga dang ajungbena tetsür atema jembitsür ka aküm aser tang iba onük kanga tebenja kümogo, ta CNTC-isa metetdaktsü.
Cabinet-i iba telemtetba agiba sülen jembitepa arudang, cabinet telemtetba jagi Assembly telemtetba agientettsü asü masü ta tasüngdangba adokogo. Iba nung ozüng amertemi ashiba agi, 2016 cabinet telemtetba ajanga 2012 küm Assembly telemtetba mainshitettsü ta ashir, ta parnokisa shisem.
Anungji, Nagaland state nung tetsür nem shilem 33 lemzüka meyutettsü aser iba ya ozüng agi memelar, ta CNTC-isa ashi.
Parnokisa state sorkar dang Rongmei onük atema mapa inyakba metetnüa asüngdangogo.
Iba onük atema sorkari ita ana tejaklen cabinet sub-committee ka tentet saka tang tashi parnok nungi osang kecha mali. Iba ya ajanga state sorkari iba onük süoki ia mebilemer ama bilemer saka nübortemi aginüba ama mapa meinyakba ajanga tatem nung sorkar tebilemtsü angutsü.
Lotha Hoho-i PIL benokba nung Central Nagaland Tribes Council (CNTC)-ia pusema nungiter. Sorkar mesüra sorkar den madenba telok shiangaia, nübortemi magizükba aser maginüba mapatong inyaktsü makok, ta parnokisa ashi.
Tenemtsüng lenmang yangluba maparen anenba aser Niuland sector nung kilometer 8 meyangluba atema CNTC-isa chief minister aser bangdak minister na dang January 2017 nung tembang yanglutsü ta nangzükba ama mapa inyaktsü ayongzükogo.
Mon, Longleng, Mokokchung, Zunheboto aser Wokha nung alirtem atema tenemtsüng lenmang ya kanga tongtipang lir. Anungji, state sorkari iba mapa tekaratiba nung tembanga inyaktsü atema ayongzüker, ta Media Cell CNTC sangdong nungsa shia lir.