Tetsür nem yimten tashi agütsüba ajanga dang parnoki chichiba tashi angutsü : TR Zeliang

Kohima, January 24 (TYO) : Tetsürtem yimten nung tashi anguba sülen ang parnok chichiba tashi angubaji asütsü, ta Nagaland Chief Minister, TR Zeliang-i tanü ashi.
“Wadang aika nung tebur dang nungi tetsürtem tajungba lir, saka kodang tetoktepa arudir, tetsürtemi tebur memeneper aser iba jagi loktiliba nung tashimaiter nem shilem lemzüka ayutsüba nüngdakji adoker” ta tetsür nem 33% lemzükja urban local bodies election agitsü lemtetba pusema TR Zeliang-i jembi.
Kasa yimya nung asenoki sorkar mapatem nung tangar memeneper nem shilem lemzükba agizükogo. Anungji, tetsürtemi inyaktettsü atema parnok nem shilem lemzüktsütsüla, ta tanü National Girl Child Day sentong nung o jembidang Chief Minister-i ashi.
Paisa ULBs election nung tetsür nem shilem 33 lemzüktsüba magizükba teloktem dang parnok tangatetba meyipa reprangshistü aser lemteta aliba ama elections agidaktsütsü atema mepishia metetdaktsü.
“Tanü, linük ajungalen National Girl Child Day amungdang, ULB nung tetsür nem shilem lemzükba anema nokdakba tribal hohos aser teloktem dena Nagaland nung aliba nübortem dang nenok tangatetba meyipa reprangshitsü ni ayongzüker” ta TR Zeliang-isa ashi.
“Nenoki nenok tangatetba aser tebilembatemji memelenshitet nunga, nenoki angatetba aser bilembaji tangar nem amokmerena agizükdaktsütsü temerang ta ni mepishir” ta paisa shisem.
Yaküm State Assembly nung sorkari tetsür nem shilem 33 lemzükba indang onük benoka mejembidang, sorkari tamasa Naga Hoho aser Eastern Nagaland People’s Organisation ama tongti teloktem den ajurutepa, parnok tebilembatem asüngdanga liasü.
Ao Senden-i land & building tax agientsü ashi, Angami Public Organisation-i Nagaland nung Schedule Caste agientsü ashi aser ENPO-ia tetsür nem shilem lemzüktsüba anema menokdaktsü ta telemtetba ka agi aser ano telok karia kasa telemtetbaji agia liasü. Ajisüaka, kin hoho temi parnoki lemtetba meyipa agir ULBs nung tetsür nem shilem lemzüktsüba magizükba atema sasa bilemer, ta Nagaland Chief Minister-isa metetdaktsü.
“Tesüiba mapang tetsür nem nok, nü aser prangpong nung metangshidaktsü, saka tanübo tetsür Police force (Mahila India Reserve Battalion) dena lir aser parnoki Commonwealth Games mapang linük yimtiba nung mapa tajung inyakba atema konang nüngsang nguteta lir. Mapangtem melenshiogo aser asenok (Naga) nungertemi mapa melenshiba den jangyu medema jajatsüla” ta paisa ashi.
“Nagaland nung ULBs nung tetsür nem shilem lemzüktsüba onük atema tawa Nagaland nung mataloktsü aika atalokba asenoki angur. Naga nunger loktiliba nung akhidang nungi tetsürtem bendanga mamshi aser tebur den kasa dang züngshir. Tetsürtem bendanga mamshir, anungji parnok nem shilem lemzüktsütsü nüngdak madoker ta nisungtemi ashir, saka ajak jibo shitak masü ta nibo bilemer” ta TR Zeliang-i ashi.
Naga nunger putiotsü nungi tanü tashi yimten mesüra public policy maparen nung tetsür nem kasa shilem magütsür. Asenokia iba ya asen sobaliba inyakyim ka ama züngshir. Anungji, village council amala sobaliba rejutem nung iba inyakyim tanü tashi asenoki benshir. Anungji, asen state renlokba aotsü atema inyakba maparen nung tetsürtemia shilem tajung agitettsü atema State Legislative Assembly aser Urban local bodies amala ‘non-traditional institutions’ nung tetsür nem shilem lemzükja inyakdaktsütsüla, ta Chief Minister-isa ayongzük.
Iba sentong ya Department of Social Welfare-i Nagaland State Resource Centre for Women den yaritepa ayongzük.
Iba anogomung ya “My Girl Child – My Asset, not a liability” omen nung ajemdaker amung.

You must be logged in to post a comment Login