Tetsür ODI ranking nung Goswami-i temaba jenjang tongogo

Metsüremi/March 4, 2019 (Agencies): India tsür rongnungi asayar tejen Jhulan Goswami Hombarnü tetsür ODI bowler tem rongnung temaba jenjang tongogo. Tawa England den ODI asaya akokba nung shilem tajung agiba sülen tang lai iba jenjang tongtetogo.
Arishi küm 36 tain Goswami shibai 2017 February ita iba jenjang ajangteta liasü lai taoba series nung wicket 8 agia lar team jenjang tanabuba tashi ani aser 2021 Women’s World Cup hosts New Zealand den temaba jenjang nung aliba team pezü rongnung densema iba asayamung nung indang indanga shilem agitsü atema maongka nguogo.
Tang sangdongba rangking nung ICC Women’s Championship series tanga ka, kong Australia-i 3-0 agi New Zealand madak takok ngua liasü, iba ya dena asadangogo aser Australia tetsür team-i asaya 12 nungi point 22 nguteta parnok temaba jenjang nung lir.
India team-i asaya 15 nungi point 16 nguteta tanabuba jenjang nung lir aser tasembuba jenjang nung New Zealand (asaya 15 nungi point 14) team lir. World champions England team South Africa sülen jenjang pongububa nung lir.
Goswami-i tang tashi nung wicket 218 agia lir aser lai temaba jenjang nung anogo timtiba aliba record yanglutsü ana nung lir. Lai tang tashi nung temaba jenjang nung anogo 1873 liogo aser la jakdang Australia tsür Cathryn Fitzpatrick (anogo 2113) dang lir.
Goswami den külem opening bowler Shikha Pandey jenjang 12 tejakdangi atua jenjang 5buba nung lir. Laia England den asaya nung wicket 8 agia liasü. Küm 9 tsüngda tang mezüngbuba India nung bowler ana top 5-i iogo.
Kasa mapang nung India tsür opener Smriti Mandhana, shibai tawa tembangba ICC Women’s Championship nung run 837 yanglua liasü lai point 797 nguteta maneni temaba jenjang nung lir. 2012 March ita Mithali Raj aser Goswami nati mapang ka nung batting aser bolwing list nung temaba jenjang tongtetba sülen tang mezüngbuba India tsür ana jenjang anaprongla nung temaba jenjang nung lir.
Maneni Natalie Sciver-i taoba asayamung nung run 130 yangluba sülen jenjang 10 tejakdangi tua jenjang 5buba nung lir.
Jenjang tajungba nguteter asayartem rongnung Australia tsür Alyssa Healy aser Rachael Haynes, New Zealand tsür Sophie Devine aser Katie Perkins nunger densema lir.
Bowler tem rongnung Australia tsür Jess Jonnasen aser England tsür Sophie Ecclestone nati jenjang tajungba ajangtetogo.