Tetsür rongnung Mt. Everest-i mezüng tutetla süogo

Tokyo, October 23 (Agencies) : Tetsür rongnung 1975 küm Mount Everest-i mezüng tutetla arishi küm 77 nung süogo, ta Deobarnü Japan osangbenertemi metetdaktsü.
Japan tsür tenemi atur Junko Tabei Saitama tesem nung aliba mozüki ka nung Brihostibarnü cancer tashidak agi asü. Lar kinungertemi aa asüba osang ya taoba hopta tatemlenang metetdaktsü, ta Efe osang ajanga metetdaktsü.
Tenemi atula ya 1939 küm aso aser lai alima nung tenemlak talangtiba, meters 8,848, Mt Everest-i May 16, 1975 nü la arishi küm 35 asüba mapang tutet.
1992 küm tashi nung lai “Seven Summits” ta ajaba tenemlaktem – Everest, Aconcagua, Denali, Kilimanjaro, Elbrus, Puncak Jaya aser Vinson (the “Messner version”) ajaki tutet.
La Showa Women’s University nungi English literature züngtem. Tabei-i 1969 küm “Ladies Climbing Club: Japan” tentet.
Tabei akümlidang lai linük 60 dak tema nung aliba tenemlaktemi tuogo aser la arishi küm 70 junger külena bendang limai küm nung punguben mesüra trokbenbosa oa liasü.
Lai la taküm otsü kaket ka dena kaket aika zülua lir. 2008 küm Mountain Institute, Washington-i la nem “Mountain Hero Award” agütsü.