Tetsür tanur amokmerenba keno nung police ana suspend sütsüogo

Mokokchung, July 29, 2024 (TYO): Tan July ita 24 & 25, 2024 nü Mokokchung nung police anadi machimajemtsü chiajemer tetsür chanu ka dak aser ano la tebu dak amokmerena mejungi benshiba keno dak sentakba nung police anaji mapa nungi suspend sütsüogo ta, Additional Superintendent of Police & Public Relation Officer, Mokokchung-i sangdong ka ajanga metetdaktsüogo.

Iba maparen dak sentakba nung tatongi bushisüngdangba agitsü aser aibelenba alang tapet merenshitsü. Ozüng alema aibelener aser tazüokba maliba Police-temji odangbo metoktsütsü saka par mapa apet merenshitsü. Tarutsü nunga police kari danga duty mapang machimajemtsü chia jemer tim mesüi benshiba mesüra nübur amokmerena osang metetra, bangdak nem metetdakjang ta, Addl. SP & PRO-isa mepishia metetdaktsü.