Kullu (Himachal Pradesh), October 28 (Agencies): Hombar nü tetsür kümzüka aser wazüka ayutsü asoshi ayongba sentong nung nisung 10,000 dak temai sobaliba tsüngsang nung shilem agia liasü, ta sentong ayongertemi ashi.
“Himachal nunger tetsür aser tebur 10,000 dak temai sobaliba tsüngsang ‘Kullu Natti’ nung shilem agia tetsür tanur kümzüka ayutsü yimyim ayimokja liasü,” ta Deputy Commissioner Rakesh Kanwar-i IANS dang ashi.
Ajak agi tsüngsanger nisung 14,700-i iba sentong nung shilem agia world record tasen yangluba den Kullu sobaliba alima nem metetdakja liasü.
“Shilem agitsü tenüng agütsürtem karbo tsüngsang kanga majungba ajanga sentong nung shilem agitsü asoshi marutet,” ta pai ashi.
Pai ashiba agi, item tsüngsangertemi gondha ka shi tsüngsang aser tetsür tanurtem kümzüktsü atema bendanga agüja inyaktsü tenangzükba agi. Iba sentong ya Kullu Dussehra benjung den sentaktepa agia liasü.
Yaküma iba sentong nung nisung 8,760-i shilem agia liasü aser Limca Book of Records-i tenüng ai.
Iba sentong ya Guinness Book of World Record official temi repranga liasü.
Kanwar-i ashiba agi iba jakdang sobaliba tsüngsang ka danga world record-i ia mali.
Kullu Dussehra benjung ya October 22 nü tenzük aser October 28 nü tembangtsü.
You must be logged in to post a comment Login