Tetsür-tanurtem temeten

Asenok kecha memetetba mapangbo tetsür aser tanurtem asoshibo kecha temeten mali amato bilema mezüngmeshia amshi. Yimten aser lokti senden nung marudaktsübajibo yutsür, kidanga tetsür tanurtembo ola madokdaktsüi tebang nembanga yutsü. Tetsürtemjibo nubenba oset amai dang amshi aser tanurtem nema anojungi mapa inyakdaktsü. Ki mapa ajak tetsüri inyak aser alui aodang aser adokdanga tetsürtem nemang  khu tuluba bendaktsü. Ajisüaka, balaluladang aser asüama senlem nung tagitarutsü nungbo tetsür shilem kanga agia tilaba atatsü. Atangji, tanübo asenoka shisa tenük terabo saakadoker asünungji, tebur aikati tetsür tanurtem meima aser akümtsübua amshir. Kaketshisatsü angazükdaktsüba nunga tetsür tebur kecha bensaa mamshii ajak nem kasasa maongka aser teyari agütsür. Iba jagiang, tanü kaketshisatsü bushiba maparen nung teburtem dang nungibo tetsürtemiang tajungba takok anguba angur aser mapa bushiba nunga government aser private mapatem ajak nung tetsürtemang teimba aser tajungba inyakba angur. Joko, tanübo teburtemang tetsür driver aser peon kümer tenzüker aser tetsürtemi yangluba kiojen nung teburtem anioka alir. Joko, mapa nunga yabo tetsür mapa aser yabo tebur mapa ta kecha tebendang mali, tetsür tebur ajak kasasa shilem agia inyaker. Teburtemiang kiojen tajungba aoker, soruchioker, naro anepalur aser kidang tanurtem anepalur. Ano, tetsürtemiang yimten ketdangsüba, obendangba aser mitkar mapatem nung teburtem dang nungi tajungba inyaker. Iba ama asenok loktiliba nung tetsür tebur tsüngda kecha telemsa melii kati ka akümtsübutepa yaritepba ajanga kibongtema tajungba libalirua aor aser lokti aser yimtena tesünep nung aor. Ajisüaka, asenoki ano junga ayimjema akümtsübua mamshitetba telokji tanurtem ya asütsü. Akhidangbo, tanur asobaji yakta dang tsürabur ki aser alu mapa nung yaritsü aru ama bilem. Ibayongji, akok tashi kibong ajak nung tanur aika asotsü merangtep. Aji oda, nübener kibongtemang alu tulu yima tebok sünga ali. Iba mapang nung asor tanurtembo lanuwa mapang memdemertem den  anisüngzüka pelatepa kazütsüsa mapang mangu, kechiyong kidang tantsüla mesüra tambusangji pei tenu nunger apongtsü aso ama, tenu nungertemji tain maküm tashi parnok ponga anepalu aser parnok tain kümerbo külemi tsüraburtem den alui ao. Iba amaji tanurtem dak aketba tekolok, shisatsü aser sempet amshia parnoksasa parnok nisung küma aotsüsa mapang magütsü. Asenok tsürabur mapang, otsü nungbo tanurtem lanuwa mapangji ayongayonga pelshishia shisarenlokba mapang masü saka timtima mapa inyakba mapang liasü. Atangji, tanüa tanurtem aika tain makümdangyongi kidang aser mapa inyakdak tesem balala nung mapa tasak inyakdakja angur. Tanurtem karbo kidang kilir mapa inyakdaktsür aser pa mesüra la dang nungi tuluba aser taretba ponger anepaludaktsür. Tsürabur aser tain karibo tanurtem dak mapayui azüker aser chiyongtsüa tajungbo magütsür. Ano tanü tensa nungbo tanurtem azüngdak kaketreju kima anasa sali moko ayokbajia parnok mezüngmeshiba mapa  amato linük ozüngi züngshir. Aji oda, akok tashi tanurtemji mejashidaktsüi parnok taküm agi parnok akümketa bilemtsüsa lidaktsür. Tanur asüba mapang kechi koda pei tsürabur aser taintemi parnok dak benshi, kasaji parnokia tain kümer külen inyaktsü bilemer. Asenoki itemji kecha süoki ia mebilemi tanurtem, sali moko alii yokbajibo yutsür, yi alii dena yoker. Tanurtem kaketreju nashi ki ama nung züngdaktsür aser ayong ama nung jajadaktsür. Tanurtem pelatepa asayaa kazüdak aser shisatsü angazükdak tesem ajak nung asenoki ki yanglur, anungji tanurtem asayadak maka, kidang mobile amshia amoker. Itemji asenoki tanurtem temeten mezüngshii inyakba ajanga ataloker. Kechalenia mao, medemertem den moapu nung ken danga asayaba tannurtem otsü nung mali ser kidang, kidang dang mobile phone amshia moktetba tanur jagi pei temeten, maongka aser temoatsü memetettsü. Tanurtema kenkenbo pei medemertem den moapu nung asayatsübaji, kidang tsüraburtem den shisa tajung lemsatepa kazütsübaji aser pei dak aketba sempet amshia lokti nung shilem agitsübaji parnok temeten lir. Iba temeten jagi parnok senso tajung küma indaktsütsü.