Tetsür Tashi

Myanmar nung National League for Democracy (NLD) lenir Aung San Suu Kyi-i tan Myanmar general election nung nübo yima jajaba aser takok anguba angudang alima nunga yimten nung tetsüri yamai tasü aser tashi itta shilem agir no ta bilemer. Asen lima nungbo tetsürtem yimten nung shilem agitsü asoshi ‘Reservation’ nüngdaker. Ibaji maliba agi tanü tashi nung, talisa, Nagaland tatar senden nung tetsürtemi shilem magitetter. Aji oda, Nagaland kümer küm 50 dak tali süiaka, tang tashi nung Nagatsür katia MLA mekümtetbaji Nagatsürtem asoshi dang masü saka Naga nunger ajak asoshi tebilemdangtsü aser tayongzükba tuluka asütsü. Aung San Suu Kyi dak yimten nung shilem agitsü tangatetba aser temulungtetba aliba tashiji kangasa tulu, anungji lai kecha meratar aser metsübur. 1988 küm lai anir Burma lima nung Democratic yimsüsüba bener arutsü asoshi merangba mapang lai aniba teloki election nung takok angu, anungji parnoki yimsüsütsüba liasü saka sepaitemi parnok nem yimten tashi magütsü. Iba ama tia ka nung Burma sepaitem ket nung yimten tashi ajak amer Aung San Suu Kyi-ji lar ki agi tepuokdak kümer la kidang nungi mayazükdaktsüi küm aika puoka ayuba otsü asenoki meteta lir. Election nungbo adok saka yimsüsütsü tashi magütsüba dang masü saka pei ki agi tepuokdak kümer ki alema kechalenia moudaktsüi ayuba timtemji alima nung nisung ka asoshi kanga tulu lir. Iba ama timtem aser tetsübutsü tensa tia ajak kokteta Aung San Suu Kyi-bo inyaktetogo. Lai Burma sepaitemi la taküm dena samatsütsü amokmerenaka metsübu., kechiyong la dak Burma lima aser nübortem meimba tangatetba tashiji ulura liasü. Aji oda, la dak pei lima aser nübortem meimba shisatsü tulu aliba ajanga pei lima aser nübortem asoshi inyaktsü tasü itaa nokdangdang la anemertemi la anema kecha meinyaktet, kechiyong la dak temeim aser ochi liasü. Tan election nung lai tesem balala tonga oagi nübortem den jembidang, ” Nisung kari nenok nem vote enoktsütsü atema senotsü agütsüra meshiang saka vote -bo NLD nem enokjang,” ta jembia ao. Aji oda, la jak reprangdangner, lai jembiba angadangner aser la den jembidangner nisungtem agi lokti tulu adenshia liasü. La anemer tang yimsü tesüdak akhidang sepai nung alirtemi akümba telok Union Solidarity & Development Party purtemi nübortem dang sen agi vote alitsü mesüzükba osang angashia lai ” senjibo agiang saka vote-bo NLD nem enokjang,” ta asüba osangji Myanmar nungertem asoshi bilemdanger peisasa telemtetba agitsü kanga tongtibang o ka liasü. Iba o jagibo asenok dena kanga jembir. Tan election nung Myanmar nung yimten telok kati sen agi vote alitsü merangba amato asen lima nunga ataloker. Ajisüaka Myanmar nunger o asenok shisatsu aser tangatetba na kenyongi balala lir, kechiyong Nagaland nungbo senyong vote ayoker saka Myanmar nungbo senyong  vote  mayoker. Asenok amangba purtem o mangmangba purtem na tsüngdaji ibaji lir. Asenoki matateter dang ashi, tatem nungbo ochi agisa akoktsü. Aung San Suu Kyi takokji sen agi masü mesüra pei asoshi rongsen bendentsü bilemba agia masü saka ochi mulung agi pei lima aser nübortem tejakleni odaktsünüba tangatetba agi liasü. Pei lima ochimashi tia nungi kümzüka anitettsübaji temela masü. Iba tongpangjibo sen agi masü ochi agidang akoktsü aser ochi agidang nübortem tipdema alitsü. Nagatsürtema mesüra Naga nungertema sen akaba agi sen agi sen melentsü asoshi electioni maitsüla mesüra sen yong tangar dang pei yimten yimli aser meraket mayoktsüla. Kodang südirsüaka, election arutsü, idangji tanü Myanmar lima nung Aung San Suu Kyi-i anir tetsüng agi aser bicycle nung nübortem tongatonga oagi ‘ election-i aier kari nenok nem vote enoktsütsü asoshi sen agütsüra meshia agiang saka vote-bo onok nem enokjang,” ta ashiba o ji bilemtetdi. Election nung vote alitsü asoshi agütsüba senji meranga inyaker anguba sen masütsü saka nübortem tenüng amshia auyaba sentem asütsü. Iba ama sen jagi kar danga takar akümba ngura kangshia electioni yokang aser senji meshia chijang saka votebo tagütsüma. Myanmar lima yamaji yanglushi tenzükogo. Par jiluji ajizüka asenoka yamaji yanglu tenzüktsüla.