Tetsür yimsüsür anati Britain PM menden atema tokteper

London, July 08 (Agencies): Britain Home Secretary, Theresa May aser Energy Minister, Andrea Leadsom na tsüngda Britain Ato Kilonser menden atema tokteptsüsa tenati jenjang tajung nguogo.
Britain madak yimsü asütsü asoshi tashi ngua alir Conservative Party yimtenren telok nungi yimsüsürtemi agiba Ato Kilonser tasenba shimtsü election nung parnok 199 tashi May nem vote agütsü, 84-i Leadsom shim aser parnok 46 tashi Justice Secretary, Micheal Gove nem vote agüja liasü.
Aji oda, Gove-i vote tajemba anguba yong pai Ato Kilonser menden atema maneni tokteptsü temeten mongutet aser May o Laedsom na tsüngda Ato Kilonser menden atema tokteptsüsa jenjang bener arutsü.
Britain ajunga nungi Conservative telok nung züngsemer nisung 150,000 shi post ajanga pei vote agütsütsü aser iba election nung temaba jenjang angula, arishi küm 59 tain May mesüra arishi küm 53 tain Leadsom-i Britain Ato Kilonser tasenba küma David Cameron melenzüktsü.
Tan tetsür yimsüsüri Britain Ato Kilonser menden abentsü jenjang anguba ya Margaret Thatcher 1990 küm yimsüsütsü menden nungi atsüngdokba sülen Britain-i tan mezüngsüa tetsür Ato Kilonser shimtsü renemshir lir.
May mesüra Leadsom na rong nung ka Ato Kilonser tasenba inyaktsü shimba osangji taküm September ita 9 nü alima dang sangoktsütsü.
Britain linüki Brexit ta ajaba European Union (EU) toktsütsü telemtetba taoba June ita 23 nü agiba sülen Cameron-i Britain Ato Kilonser menden toktsütsü lemtetba osang metetdakja lir.