Tetsürchanu ka dak teim mesüi kongshiba dak sendakba nung Joint Commissioner of Tax jenshir

Itanagar, August 23 (Agencies): Joint Commissioner of Tax and Excise Tani Jongkey-i tim mesüi kongshiba arishi küm 11 tain tetsür chanula tetsüi Chief Minister Pema Khandu dangi temepishiba shidi ka züluba CM-i agizükogo.
Iba shidi nung temaba jenjang nung aliba ketdangsertemi pa kümzüktsü meranger ta shia aija lir.
Osang ajanga ashiba agi, Jongkey tepuokdaki pua anir aotsüba nungi jenbutsü meranga arudar aser anticipatory bail dena apply südagi.
Laia ashiba agi, aija alisang ya sorkar tenzüker ka lir aser mapa tongtibang ka nung inyaker. Pa tang teinyakadak mapa nungsa meneni inyakra pai iba ken o bushisüngdangba pa tashi aser jenjang amshi pa ajungleni meyipdaktsürtsü akok.
“Iba ken o dang o tebendang dak lir aser ozüng nung aliba ama teinyaktsü tim inyakyonga aotsü saka tesem kar nungbo nia teka amoka inyaktsü nüngdaker. Aibelena alisang ya sorkari mapa nungi tangsa anedaktsütsüla. Ajisüaka tang tashi nung pa mapa nungi anendaktsütsüba ken o bangdaka dang lir aser tejakleni maoer aser department nung awiponga yua lir. Iba dak sendakba nung ketdangsertemi teinyaktsü tim shidak teka amteper meinyaker,” ta lai shidi nung zülutsü.
Kodang pai anticipatory bail meshiba okadak magizük, pai pa sasa Tomo Riba Institute of Health and Medical Sciences, Naharlagun nung temang majungba dak atemer temang anepalutsü asoshi ao. Pa tang tashi mozüki nung mongdar aser iba ajanga police temi pa moputeti lir.