Tetsürtem 2017 Euro Cup asayamung Dutch-i akok

Enschede, August 07 (Agencies): Tetsürtem 2017 Euro Cup football asayamung final Enschede nung Netherlands aser Denmark tsüngda Deobarnü asayaba nung hosts Netherlands-i 4-2 agi Denmark madak takok angu aser par linük asoshi tetsürtem-i Euro takok marok mezüngbuba benogo.
Dutch tsür Miedema-i asaya tenzüker minute ter buba nung goal ka agütsüteta telok ana tsüngda goal 1-1 aküm aser lai asaya tembangtsü minute ana anünga lia maneni goal ka agütsütet. Iba asaya nung kasa telok nungi Lieke Martens aser captain Sherida Spitse natia goal kaka agütsü.
Asaya tenzüker minute trok buba nung penalty box nung Netherlands telok nungi Kika van Es-i Denmark tsür Sanne Troelsgaard alangdaktsüba ajanga penalty ka mena aser iba penalty ya Nadia Nadim-i agütsütet.
Saka Netherlands tsür achichilen winger, Shanice van de Sanden-i yokba ball junga agizükteta Miedema-i iba ball metsüoktsütet.
Martens-i minute 28buba nung penalty box tezülen nungi metsüba ball ya Danish tsür keeper Stina Petersen-i meputeti idaktsü.
Asaya tenzüker minute 33buba nung Denmark tsür Danes-i metsüba ball ya Dutch keeper Sari van Veenendaal-i tetsüng agi aputsü merang saka lai junga meputeti iba goal ya idakja telok ana tsüngda goal kasasa aküm.
Asaya tanabuba shilem asaya tenzüker minute pongububa nung Spitse-i free-kick nung Netherlands atema goal tasembuba yoktet aser minute 89buba nung Miedema-i Denmark tsür defender ka ashiokja la asoshi tanabuba aser lar telok asoshi pezübuba goal agütsütet.
Iba asayamung takok angur telok rongnung Dutch telok ya pezübuba lir. Iba asayamung ya Germany tsürtemi tiben, Norway-i anaben aser Sweden teloki iba asayamung mezüngbuba (1984) koka lir.
Telok anprong ya iba asayamung final nung mezüngbuba asayar liasü.
Martens-i asaya tenzüker minute 15buba nung goal ka yoktettsü maongka ngutet, saka lai tashi ajak agi memetsütetba ajanga Petersen-i iba ball putet.