Tetsürtem anogo aser mapa

Küm shia amongba ama, taküm 2022 küm asoshia yashi March 8 nü alima ajunga den külemi Nagaland nunga tesem balala nung tetsürtem anogomung mongogo. Iba anogomung sentong ayongzükertemi mapa tajung apiteta inyakbatem rongnung, pei inyakba wadang nung tangari ‘hau, laisa tajungba inyaktetogo’ ta shitettsüsa takok ngua inyakba tetsürtem nem tenüngsang sempet agütsüba ya asütsü. Iba ama tenüngsang agütsüba mapatem agi sempet angurtema pelar aser parnok amaji inyaktsü tangartema ajungshir. Atangji, shitakba agibo tetsürtem anogo ya teburtemiang ayongzüka mongtsütsüla, kechiyong tetsür shiai pei tsürabur, pei kinungbo, pei chirnurtem aser pei adianu kinungertem meima yariba aser anepaluba temeimji kecha dena medemdangtsü makok. Asen loktiliba aser sobaliba nung, kodang tetsürtemi abenba khuret aser temeim mapatemji jungjunga bilemdangdir, tanü putu nungbo tetsürtembo teburtem maliyonga litettsü saka tetsürtem meliang teburtembo melitettsüsa tensa tia aika ajurutsü. Ajisüaka, tebilemdangtsü kaji, asenok sobaliba nung ya mapa ajak tetsür aser tagitsübo ajunga tebur lemzük ama reprangtettsüsa asenoki inyaker.Tanü tashitemetet putu nung, item onüktemji yashi ama tetsürtem anogomung amongba anogo nung dang masü saka anogo shia asenok rongnung shisalemsatepa jembira, iba jagi tetsürtem nema akhüm aser mulung anisüngzük tulu agütsütsü. Atangji, yashi alima tetsürtem anogomung onüka iba tsütsüji atsünga, “Tarutsü anogotem asoshi bilema tetsür o tebur na tsüngda kecha telemsa melii khuret aser maongka kasasa lemsatepa agitsü,” nüngdakba indang jembia mongogo. Iba jagi asenok ama akhidang nungi tebur yimli ta ser aruba kin aser nübortem dang putu den peta asenok sobaliba melenshia aotsü nüngdakba indang tangatetba ka agütsüner. Ano, tetsürtemsa süaka alima yimya asünungji, nisunga memesük, tajemrep tia nung alirtem aika lir. Aji oda, tetsürtem anogo nung tetsür tajungertem asoshi dang masü saka pei taküm agi piesasa nümamedangteti aliba tetsürtem taküm tia indanga jembia, parnok taküm jenjang ajungkettsütsü atema shisalemsatepra, tetsür o tebur na kasasa khuret abenba aser maongka agiba anogo tajung ka aru yongyaa jembibaji asangsang nung yakta ataloktsü. Tanübo akhidang tsürabur mapang nok nü amshia lepteptsüngtepba putu masü saka rara nunga gari aser tayimtsü amshia injang prongpong aser bomb amshia raraba putu lir, anungji tongpang rara nunga tetsür tebur kecha balala mali nokdaktettsüba putu ka nung asenok alir.Aji oda, asenoki tetsür o tebur na bendangdi asüyonga mebendangtetsüsa alima inyakyim ajunga melenshia odagi. Atangji, asen sobaliba nung tebur yimli ta jembiba ya tetsür mezüngmeshiba mapa ka masü saka teburi khuret ajak bena tetsür taküm kümzüka ayutsü merangba nungi tenzükba sobaliba ka lir. Ibaji kodang tetsürtemi angatetdir, tetsürtemia teburtem tenüng mesangiang melitettsü. Iba tangatetba nung tanü putu nung tetsür o tebur na yimten nung maongka kasasa agitsüla ta jembiba onük ya tetsür o tebur na tsüngda mangatettepi raratepba ola ka masü, saka joko alima putu yimya agi tetsürtemia yimten khuret abentsüsa akümba ajanga ola adoktsüsa akümer ta ajaki angatet nung junger. Atangji, tetsür o tebur na temeten aser shilem kasasa agitsü nüngdaka jembibaji maparen aika nung masü, saka yimten sabang nung shilem aginüba aser ali senmang alemba yimya nung tetsürtema teburtem den kasasa temeten alitsüla ta tangatetba ka dangi aruba ola ka lir. Iba jagi tetsürtema maparen ajak nung tali temerangba, tenendakba aser ochitashiba inyaktsü ajungshir aser teburtem danga tetsürtem nem mapa dang masü saka maongka aser senmanga agütsütsü nüngdakba indang tangatetba agütsür. Iba onük ya küm nung khen tetsürtem anogomong nung lokti sabang nung jembir ayutsüba masü saka anogo shia pei atep nung apuani na tsüngda aser tanurtem rongnung shisalemsateptsüba onük ka lir. Iba jagiang memenui asen yimten aser loktiliba nung tetsür-tebur ta mali kasasa raktepa khuret abentsüba anogo ajurutsü.