Tetsürtem ashioktsüba ken o nung Naga tsür ka den Africa nunger 3 apu

New Delhi, July 05 (Agencies): Kiyimtsü atema bushiba matrimonial websites ajanga kibong kümner tetsürtem ashioktsüba ken o nung Delhi police, Special Cell-i Africa nunger asem den India tsür ka puogo.
Taoba mapang nunga police-i item ama telok ana puogo aser maneni Delhi police-i Nigeria nungi arishi küm 26 Joseph Irabor Bhahemen aser Bawo Hilary Omagbemi (35) na den Nagaland nungi Leniya Magh (26) puogo. Parnok ajakji tang Gurgaon nung telidak lir.
Osang ajanga ashiba agi, par teloki matrimonial website ka ajanga Hyderabad nung alir tetsür ka den metettepba sülen tesüiba ita ishika tsüngda sen lakh 48.75 ashioktsüogo.
Ano tanga ken o ka nung police-i Nigeria nunger arishi küm 30 Henry Chima Anidebe puogo, aser pai ashiba agi tanga telok nung züngsemtemi tebur ola agi custom officer tetsür ola ama angatetdaktsü asoshi ‘voice changers’ amshir, ta jungkai adoka shiogo.
Special Cell, Deputy Commissioner of Police-i ashiba agi, item telok jagi nüngtugu matrimonial website balala ajanga tai maket tetsürtem ashioktsür. Takoksa ajurur tetsürtemji Delhi densema India tesem aika nungi lir.
Aibenertem jagi VoIP aser tanga tasa balala amshia online ajanga nisungtem ashioktsüba mapa inyaker, ta police-i ashi.
Kiyimtsü bushirtem puadaktsütsü atema aibelenertem jagi taila profile amshia India nunger bendanglen mapa balala inyaker aser takar ama sayur.
Parnoki UK aser US indang densema foreign SIM cards amshir saka itemji pei aliba tesem memetetdaktsütsü asoshi international roaming nung India telung nungi amshir.