Tetsürtem dang taaktsüka !

Tang India ajungalen teburtemi tetsürtem dak tashiyim agi mapa tamajung inyakba indang alima sünga jembiba otsü yagi tetsürtem masü teburtem mak asür. Ibai teburtem asoshi taaktsü mapa ka lir. Atangji, teburtemi tetsürtem dak tashiyim agi mapa tamajung inyaka taküm raksatsübaji tetsürtem asoshia maksü saka tetsürtemi ajuruba maksü dang nungibo teburtemang maksü tuluba lir. Ano, tanü asüng atalokba mapatem ya jungjunga bilemdangra, küm tenet-ti tain tetsür chanu ka tebur tain asem pezüi pua bener oa merenshir külenang tepseta yutsübaji nisungi inyakba mapabo memesük. Tetsürtem ya teburtemi pei sünütsüsüa pei shi jangratem asoshi amshitsü yangluba takümtem masü. Parnokji alima nung tebur kija ali majungtsüla asüba agi teburtem den yaritepa alitsü asoshi yangluba kasa nisung aser ka meimchir ta ajaki angatettsüla. Aji oda, tebur kija alibo majung asüba agi tetsür yanglu süra, teburtemiang tetsür temeimba aser aküm tetsübuba tsübua aser meima benshitsüla. Tetsürlaji tangar masü laji ojala, jala tajung ka, oyala aser tenüla. Parnok ajanga dang nisung ajak alimai arur aser parnok ket agi dang anepalua intetter. Item ama taküm kaji anepalua meimtsü melen teburtem aikati parnokji nisung masü saka shi azü jangratemtsü asoshi amshiba kazütsü amai ka dang bilemer. Iba jagi teburtemi tetsürtem taküm raksaa yutsür külenang parnok anema mezüngmeshia jembir. Ano, tebur aikati teburtemi tetsürtem dak tashiyim mapa tamajung inyakbaji teburtem tai masü saka tetsürtem süoshi mashimashi agir seplepa senzüdang ajuruba otsü amai jembir. Ajisüaka, asenoki jungjunga bilemdangra teburtemi tetsürtem anema inyakbaji lai sübuba süoshi agi masü mesüra la mekümdangi senzüba ajanga masü saka teburtem dak mazüokba shisatsü tamajung aliba ajanga atalokbatem lir. Joko, teburtemi tetsürtem dak tashiyim agi mapa tamajung inyakba osang yagi teburtemi tetsürtem anema tim masüba maksü mapa tulu inyakogo ta teburtemi rajema arutsüla. Iba ama mapa tamajung tetsürtem anema inyakba ajanga tebur ka taküm nung maksü bena arur ta tebur shiai angatettsüla. Koba tamangba yimsü amanger südir süang mesüra koba kin aser kidong nungi südir süang tetsür taküm kaji tebur taküm ka den kasasa, anapronglaji alima meimchirsa, anungji kati ka akümtsübutsüba dak alaka mezüngmeshia amshitsübaji kenyongi madoker. Iba tangatetba ya kibong shia nung agütsütsü tim aser ano kasa tangatetbaji school aser arogo nung sayutsü tim. Atangji, tanü lima ya japujariba lima ka kümogo, anungji kibong nung tangatetba tajung magütsüra, noksa tamajung reprangba aser kaket tamajung azüngba kisüng agi nisung ka taküm peisasa pei shi azü mazüokteti tamajung küma aor. Itemji kibok sayubentsü aser loktiliba nung tangatetba agütsüba agi akoktsü. Atangji, teburi tetsür taküm mezüngmeshia amshibaji tai, anungji temerenshi tulu agütsütsüla. Ajisüaka, nisung ka dak tangtetba melira temerenshia metsübu tamajung inyaker. Iba ama nisungji tanü India nung yimsüsüba menden nunga aika lir. Iba ama tensa tia ka nung, tanü India nung teburtemi tetsür tanurtem taküm mapayui tashiyim agi mapa tamajung inyakba atalokpet atalokba ajanga alima tsüngdang India nümamedangteti lir. Kasaji mapang mapang shia Nagaland nunga atalokdagi. Iba jagi Nagaland tenüngmenüker. Teburtemi tetsürtem dang taaktsüka inyakogo. Taidok meshiyonga item tatalokbatemji matalok mekümtettsü. Itemji pei mapa dak alang ozüng agibo merenshitsü. Ajisüaka, tang nungibo tetsür- tebur ajak pei taküm aser pei mapa agi nümadangtetdangteta alitsüsa, teburtemi tetsürtem dang taidok meshitsüla aser teburtemi tetsürtem taküm apayua anepalutsüba dak alaka tashiyim agi merenshitsübo tebilema mebilemtsüla.