Tetsürtem mezüngmeshia amshiba saya ka sayutsü

Dimapur, Nov. 02 (TYO): Tan Hokolbar Nov 6, 2015 nikongdang 4:00 ako nungi IMC hall Dimapur nung saya ka (theatrical play) tenüng agi ‘Don’t Women, no cry’ sayutsü asoshi Khar kaketshir Telongjem Dimapuri renema lir.
Iba saya ya “Hill Theatre” teloki ia sayutsü. Hill Theatre telok ya National School of Drama, New Delhi nung züngtetsang, Wb. Bendang Wallingi tenzükba lir. Iba telok yagi tanü asen kibong aser lokti nung ajuruba timtem tia indang jilushia (drama) ajanga sayua temelenshi bener arutsü meranger. Tang tashi nung Wb.Bendang Walling leniba kübok par teloki aiba jilushitemji ‘The third eye’, ‘N.H.36’, ‘Chimti : The Ant’, ‘ The Wedding’ aser ‘Charlie and the chocolate Factory’ lir.
Tan aitsüba jilushi (play) ya tanü asenok kibong aser lokti nung tetsürtem mezüngmeshia amshiba, tim akhümtsübu magütsüba aser tetsürtemi item anema ola adokaka shingaia hau ta aria bilema meshisadangba tensa tia indang alitsü.
Iba saya reprangnertem asoshi iba saya sayudak tesem (IMC) nung ticket angutsü, anungji kecha menungnangi talisa tetsür temeten asoshi nokdakertem aser tereprangner tetsür tebur ajak medema arua reprangdaktsüner, ta iba sentong ayongertemi metetdaktsüogo.