Tetsürtem nem kaketshisatsü bushitsü maongka agütsütsüla: Michelle

Kakata, June 28 (Agencies): US Tir, Barack Obama kinüngtsü, Michelle Obama-i Liberia nung ayonga agiba tetsür nem lenisütsü terenemshitsü agütsütsü sentong nung shilem agia, tetsürtem nem kaketshisatsü bushitsü moangka agütsütsü tayongzükba ka yashi, Hombar nü metetdaktsüogo.
Africa nung alir tetsür chanutem nem kaketshitsü bushitsü maongka agütsütsü aser parnok taküm jenjang temaba jenjang nung ajungkettsü mapatong den sentaktepa, Michelle-i Liberia kübok Kakata nung Peace Corps-i ayongba sentong nung shilem agia liasü.
Michelle-i tan Liberia semdangdang Africa nung tentetba linüktem rong nung mezüngbuba tetsür Tir, Liberia Tir, Ellen Johnson Sirleaf dena ajurutepa senden amenba osang angazükogo.
Lai lar jala ana, arishi küm 18 tain Malia aser arishi küm 15 tain Sasha na den külemi, tetsü, Marian Robinson anisemer tan Liberia semdanger lir.
Michelle-i tenzükba tongti mapatong, Let Girls Learn takok ngudaktsütsü nükjidong nung lai Morocco aser Spain linüka semdangtsü sentong renema lir.
Alima ajunga nung tashiyim agi kibong kümdakja alir, sensak tia nung alir aser lendong balala ajurushia alir tetsür million 62 shi kaketshisatsü bushitsü maongka monguteti lir aser parnok nem kaketshisatsü bushitsü maongka agütsütsü nükjidong nung Michelle-i Let Girls Learn mapatong tenzüka lir.
North Africa nung alir tetsür noklang nung shilem 85 shi tenüng primary school nung züluoka lir saka parnok shilem 14 shi dang high school azüngtsü maongkabo anguba osang bushitetogo.