Tetsürtem nem tekülem ki ajak lapoktsütsüla: Farooq

Vrindavan, March 23 (Agencies): Vrindavan nung tetsürtemi Holi benjung amungba tenüngsanga taoba mapang Jammu & Kashmir chief minister, Farooq Abdullah-i, tetsürtem tekülem kidangi itettsüsa tekülem ki (Hindu) ajak lapoktsütsüla, ta ashi.

Tanü Uttar Pradesh, Mathura district kübok Vrindavan nung sentong ka tembangba sülen osangbenertem den jembidang Farooq-i, “Tetsürtem nem tekülem ki lapoktsütsüji kanga jangratemtsüka ama nibo bilemer. Parnok-a linük nung shilem ka lir aser nenoki tetsürtem nem tashi agütsünüra tetsürtem atema tekülem ki ajak lapoka yutsütsüji kanga tongtibang,” ta ashi.

Tanü iba jila nung amitsür 1000 dak temai sobaliba benshia aruba ozüng alema akhi mapang tekülem ki nung Holi benjung mungogo.

Iba ya jangratemtsüka ta shia National Conference lenir aser taoba mapang Union minister Farooq-i, “Iba ya atalokba atema asenoki nüma atangtsüla. Iba ya jangratemtsüka aser India-a tejakleni odar,” ta ashi.

Yashi kiralongrartemi Belgium yimtiba, Brussels amakba dak sentakba nung pai, alima longjemer kiralongraba tebilemtsü atema raratsüla, ta ashi. “Kiralongraba ya amokmeren tulu ka ta alimai jangjaogo. Kiralongraba ajanga nenok-a kongshitsü ta onoki ashidang parnoki ibaji mamangi liasü. Tanübo item oji parnok narong nung ayimtener,” ta paisa ashi.

“Alima atema amokmerenji kiralongrar, aser kiralongrartem tamangba yimsü mali, pa nükjidong ka dang lir- tesem ka shimtettsü aser poksatsütsü,” ta ashi.

“Alimai senteper kiralongrartem anema raratsüla,” ta paisa ashi.

Jammu & Kashmir nung BJP-PDP teloktepi sorkar mekümteti aruba dak sentakba nung pai, “Tajung ka adoktsüla. Parnoki sorkar akumtsü atema onoki ita aika ata-a arur. Parnoki sorkar akumtsü ta onoki imlar,” ta ashi.