Tetsürtem reservation nung Naga Hoho-i masetshir

Kohima, May 18 (TYO): Tanü Kohima nung Naga Hoho telen nung Tirtem senden amendang, Naga Hoho-i maneni Nagaland nung Municipal bodies nung tetsürtem nem shilem 33 wazüka yutsütsüji kanga karara ta bangzüngba nungi masetshitsü lemtetogo, ta Naga Hoho general secretary, Mutsikhoyo Yhobu-i sangdong ka ajanga metetdaktsü.

 Yhobu-isa ashiba agi, 2011 küm August 24 nü Naga Hoho senden nung 4 buba Federal Assembly telatetba nung Municipal body tem nung tetsürtem nem shilem 33 wazüka yutsütsüji ano kanga karara, ajisüaka iba dang nungibo state holder temi tetsürtem nem maongka balala agütsüba ajanga tetsürtem tashi taliba itdaktsütsü ta bangzünga lir.

Kasa senden nung, Municipal body tem nung tetsürtem nem shilem 33 wazüka yutsütsü dak sentakba nung angatettepa amalitepa inyaktsü atema Naga Hoho Executive Council-i Eastern Nagaland Peoples Organisation den senden amentsü lemtet, ta kasa sangdong nung shia lir.