Tetsürtemi Air force raraba tayimtsü anitsü sorkari agizükogo

New Delhi, October 24 (Agencies): Tetsürtemi raraba nung shilem agitsü mapang talangka nungi yongyaa aliba tangbo atangji nung ataloktsü, kechiyong tanü Defence Ministry-i, Indian Air Force (IAF) nung tetsürtemi raraba nung shilem agitsü agizükogo.
Iba telemtetba agiba tetezü, kobi melii tetsürtemia Indian Air Force indang raraba tayimtsü amshitsü.
Defence Ministry sangdong ka ajanga ashiba agi, IAF nung raraba tsütsülen tetsür mezüng pilot temji tang Air Force Academy nung training tagitak alirtem rongnungi shimtsü.
“Iba mera agiba ajanga India tsürtemi jangraa aliba ka ataloktsür aser iba ya terenlok aliba linüktem indang armed forces tem den kasa lir,” ta Defence ministry-i ashi.
Ministry-isa ashiba agi, IAF nung transport aser helicopter stream nung tetsürtemi shilem junga agidar aser tenüng asangtsü tetemsü, iba den külemi parnoki teburtem den kasa shilem agiteter.
Tan hopta tetenzüklen Defence Minister Manohar Parrikar-i Service asemprong nungi sepai tongti asem dang armed force nung tetsürtemi jenjang tajungba nung shilem agitettsüsa report tejangja agüjang ta tuyuogo.
Raraba nung tetsürtemi shilem tajungba agitettsü atema merangsang Parrikar-isa iba onük nung o lemteptsü atema service asemprong nungi tongti asem den senden menogo.
Anogo ishika tejaklen Indian Air Force Chief Air Chief Marshal, Arup Raha-i, tetsürtemi raraba tayimtsü amshitsü atema Air Force-i benokogo, ta metetdakja liasü.
Tawa ka tashi linük nung raraba Service asempronglai tetsürtemi raraba nung shilem agitsüji arendaka bilema kuli aika agüja liasü.