Tetsürtemi külem tetsürtem nungittsüla: Priyanka Chopra

New Delhi, July 06 (Agencies): Tetsür aser tebur na nem kasa temeten agütsütsüren nung tetsürtemi külem tetsürtem nungittsü tajungshiba olen ka UNICEF Goodwill Ambassador, Priyanka Chopra-i metetdaktsüogo.

“Tetsürtem akhüm tsübutsü tesayuba tetsütemi pei jabasotem nem agütsütsü nüngdaker aser teburtemia tetsür chanutem nem kaketshisatsü bushitsü maongka agütsütsü merangtsüla,” ta lai metetdaktsü.

Delhi aser Haryana na nung tentetba school balala nungi kaketshir aser osangbener den ajurutepdang Quantico star, Chopra-i iba olenji metetdaktsü.

Tetsürtemi tangar dak memetaloki sadoka alitsüsa pei sempet tajung aser shishilembatsü tashitemetetbaren takok ngua amshitsü tayongzükba olen ka lai lemsatep.

“Kibong shia nung tetsürtem sentilung ama züngshiba lokti ka nung asenok alir. Tetsür kati lendong ajuruba mesüra lai konang bener arutsübaji kibongi lendong mesüra konang angur ama züngshir aser iba yongji, kibong tenüng merüka ayutsü nükjidong nung tsüraburtemi pei jalatem tekübokba jenjang nung yutsür jabaso ang aginer,” ta Chopra-i ashi.

“Tashiyim agi pua ayuba aser taküm raksatsüba lendongtsüdong ajurutsü tsüboa tsüraburtemi pei jalatem kima yimdongi meyokba atema sasar,” ta shia, pei taküm junga alitsüsa peisasa pei madak temulung lemtetba jala kaka tsüraburtemi anitettsü asoshi lai ayongzük.

“Asen India linük ya alima tanga ka ama aser takar o sensaker na kanga dang bendanga aliba linük ka lir. Asen linük nung oshi, sobaliba, benjungbentsü, tezüluba aser tamangba yimsü balala benshiba state balala densema lir aser iba ama temeyoktep lima ka nung alidang asenoki meimchir temaba jenjang nung züngoktsü amadoker,” ta lai ashi.

India nung tsüraburtemi pei jabaso aser jalatem bendanga amshibaren agientsütsü nükjidong nung UNICEF-i tebur aser tetsür chanutem na prong nem kasa temten agütsütsü mapatong, Fair Start tawa tenzüktsü aser iba mapatong den sentaktepa, Chopra-i tan kaketshirtem den ajurutepa liasü.

“Osangbener ya tetsüng agi senzüba mitkartem lir,” ta shia, Fair Start mapatong den sentakba osang India ajunga nung prokshidaktsütsü tayongzükba olen ka Chopra-i metetdakja liasü.

India nung alir tila tanur million 6.1 shi kaketshisatsü bushitsü temeten mongui aliba aser parnok million 10 shi nem mapa balala inyakdaktsüba osang bushiteta lir.

Ano, arishi küm 5 tain akümba jakdang India nung alir tila tanur 3,500 shi anogoshia asüba osanga bushitetogo.

Tribal kin nung züngsemer tila tanur noklang nung shilem 42 shi asoajen nung tangar memenepba aser India nütsüng yongsük tesadangka shi, nisung 564 shi tanga yimdong nung metsümeshiba osang bushiteta lir.

Küm shia arishi küm agi abensaba jakdang tetsür chanu million 2.22 shi India nung kibong kümdaktsüba kulia ngua lir.

Küm 10 shi tejaklen nungi tenzüka UNICEF den sentaktepla, Chopra 2010 küm UNICEF National Ambassador shimba sülen la nem tila tanur aser aiür asangur temeten temaba jenjang nung ajungkettsütsü mapa nunglokja lir.