Tetsürtemi metsü-meshidak amshitsü sayutsüla: Hema

New Delhi, November 19 (Agencies): Actress aser BJP Lok Sabha züngsem, Hema Malini-i,linük merüka akümtsü asoshi metsü-meshidak (toilet) amshitsü asoshi tantsür aser tamburtem dang tetsür lanurtemi tesayuba tajung agütsütsüla, ta ashi.

Kibong shia nung metsü-meshidak tesem akatsü nüngdak ta ashiba mapang, Mathura nungi Lok Sabha züngsem, Hema Malini-i, “2019 tashi nung metsü-meshidak tesem crore 10 yanglutsü nükjidong yua alibaji yimtak yimtsüng nung alirtemi angatetba ajanga dang tongtettsü,’ ta ashi.

Hema Malini-i, “India nung metsü-meshiba tesem asoshi tebilemtsü adokba ya tesayuba shidak manguba ajanga lir. Kaketshirtem aser tetsürtemi shilem agia yimtak yimtsüng nung metsü-meshiba tesem nüngdakba nung tetuyuba aser meteta aliyim kanga junga angatetdaktsüba ajanga dang iba tebilemtsü koktettsü,” ta Sulabh International-i ananü asoshi ayongba ‘World Toilet Day’ lapokba sentong nung jembiba mapang ashi.

Iba sentong nung, Sulabh ngutetsang, Bindeshwar Pathak-i, küm ka tsüngda nung mapa aika inyaktetogo, ajisüaka nija aser lokti tentettemi lungjemer metsü-meshidak tesem yanglutsüba ajanga dang linük nung iba tebilemtsü koktettsü, ta ashi.

Iba sentong ya merükmeju tsütsü inyaker loktitem nem sabang peria lapoktsütsü aser corporates o NGOs tem lokteper inyakba ajanga India nung nisung million aika nem metsü-meshidak tesem yanglutsütettsü tebilemba nung akarba lir.