Tetsürtemi pei temeden atema nokdaktsüla: Sunny Leone

Rongjui/September 19, 2018: Bollywood actress, Sunny Leone-i la taküm nung timtem aika ajangshia aruogo, ajisüaka lai item tayongzükba aika koktetogo.
Sunny Leone-i, “Tetsürtemi pei asoshi jembitettsüla. Parnoki pei tebilemba ajak jembitettsüla aser inyaknüba ajak inyaktsüla. Tetsür ajaki pei temeden atema nokdaktsüla,” ta ashi.
Madame Tussauds nung la indang kürakyanglu sayaba sentong nung Jism 2 actress, Leone-i, “Tetsür ajaki peii jangraba inyaktsüla aser pei nükjidong arshitsüla. Itemji ajanga tetsürtem tashi itshitsü, aser peisasa pei dak mulung lemtettsü,” ta ashi.
“Pei kidang tetsürtemi parnoki inyaknüba/jangraba lemsateptettsüla. Parnoki ki mapa meinyaknüra kinüngbur dang inyakang ta ashitsüla. Ibaji ajanga loktiliba nung temelenshi adoktsü,” ta lai ashi.
“Pei lenmang shima inyakba ajanga asen linük nung tetsürtem jenjang melenshitsü aser ibaji pei kidang nungi tenzüktsüla,” ta lai ashi.
Sunny Leone indang kürakyangluji la indang signature perfume inoka yanglu aser measurements den photographs 200 dak tema den medemdanga yanglu.
“Kü indang kürakyanglu atema ni kanga pelar aser süngmanger. Kü kürakyangluji ni kürak asütsü atema nisung aikati mapang talangka agia yangluogo. Mapa meranga inyakba atema ni pelar. Kü nem iba akhümket agutsüba atema ni pelar,” ta laisa shisem.