Tetsürtemi tila ama bilema atsükoka melii temai adoktsüla: Angh

Dimapur, April 22 (TYO): “Tetsürtemji loktiliba nung tongtiret lir anungji nenok tila ta bilema atsükoka melii temai adoktsüla,” ta Nagaland aser Assam Angh, P. B. Acharya-i tayongzükba agütsü.
Lokti nung tanelaren aser rongsenkettsüng tsütsü tashi itdaktsüba nung tetsürtemi tongti shilem agir aser India nung nenok tebur den jenjang kasa lir, ta Acharya-isa ashi.
Hokolbarnü Wokha nung Lotha Eloe Hoho (LEH)-i Department of Women Resource Development, Nagaland den yaritepa ayongzükba Lotha Women’s Summit nung tongti tesemdanger o jembidang PB Acharya-i iba onük jembi.
“Shia metetertem loktiliba ka nung asenok küm meyirjang aika liyonga arur aser asenok ajak kasa dang, tebendang kecha mali. Tetsürtemji tetsü, jala aser adianutsürtem lir aser parnok medeni taküm liyonga moutet, anungji asenoki parnok bendanga mamshitsüla” ta PB Acharya-isa ashi.
Tetsürtem temai adoktsüla aser longjemer asen rongsenkettsüng dak sendakba maparen tashi itdaktsütsüla, ta paisa shisem.
“India ya loktiyimten tangatetba nung ketdangsüba aser tamangba yimsü tsütsü telemsa maliba linük ka lir. Iba linük nung asenoki temeyoktep akhümtsübur, anungji asenok atema asen loktiliba tashi itdaktsütsüba mapaji tasak masü. Iba mapa nung E 3 nüngdaker aser itemji Education, Electricity aser Empowerment lir,” ta paisa tayongzükba agütsü.
Tanü Earth Day amungba atema Acharya-isa olen ka lemsatepdang, “Asen lipoküm wazüka ayutsü atema inyakba mapa nung tetsürtemi shilem tajung agitettsü” ta ashi.
“Nagaland ya menoknok kanga anokba tesem ka nung lir aser taküm menoknok 18 tashi anokogo aser iba ya asenok meimchirtem mekümdangba ajanga lir. Asen alima aser lipoküm maochii mapa inyaker aser tanü asen arem-min nung süngdonglidong makai kümogo,” ta pai metetdaktsü.
Asenoki süngdonglidong aika atemtsüla aser tekonglu ayimba yimya anentsüla, ta Angh-isa tayongzükba agütsü.
Tanü sentong nung LEH tir, Mhonchumi Humtsoe-i o jembidang ashiba agi, loktiliba nung tetsürtem jenjang ajungkettsü atema mapa inyakba nung ajemdaker aser ano International Women’s Day nüngtem nung iba Summit ayongzüka amunger.
Sentong nungsa Joint Director, Women Resource Development Department, Vilone Sakhrie-ia jembia liasü.