Tetsürtemji tebur den kasa : Rijiju

Bodbarnü Assam Rifles Training Centre And  School,  Shokhuvi, Dimapur nung Union Minister of State for Home Affairs, Kiren Rijiju -i Assam Rifles nung mezüngbuba tetsür passing out parade repranga aodang agiba noksa ka angur. 

Dimapur, April 6 (TYO) : Tetsürtemji tebur den kasa aser linük renloktsü atema wadang balala nung shilem tulu agir, ta Union Minister of State for Home Affairs, Kiren Rijiju-i tanü metetdaktsü.
Assam Rifles Training Centre & School (ARTCS), Shokhuvi, Dimapur nung Assam Rifles pur mezüngbuba tetsür passing out parade nung Rijiju-i iba onük jembi.
Assam Rifles indang puti otsü nung pa densemba atema kanga pelar aser linük security atema AR-i bendanga agüja inyaker, ta Union Minister of State for Home Affairs-isa metetdaktsü.
Tanü Assam Rifles parade nung tasen shimoker nisung 212 liasü aser parnok rongnung tetsür 100 dena liasü. Tetsür sepaitemji battalion balala nung mapa lemzüktsütsü.
Tetsür sepaitemi training mapang tangar den tajungtiba inyaktetba ajiteta tanü Rijiju-i parnok nem sempet balala lema agütsü.
Assam Rifles küm 181 otsü nung teburtemi dang shilem agia aru saka March 2015 nung India kübok tesem balala nung AR Recruitment rally tem ayongzüka agidang tetsür 127 shimtet aser parnokji Assam Rifles Training Centre & School, Dimapur nung training agütsü.
March 2014 nung Indian Army nungi tetsür ketdangser asem Assam Rifles Training Centre & School nung mapa lemzüktsü aser parnoki Training Centre nung tetsürtem atema Training Company balaka tentettsü atema maparen ketdangsüa inyak.
“Asen linük nung tetsürtemia tebur den kasa mapa inyakteter ta agizükba atema ni kanga nüma atanger aser iba ya ajanga asen linük tejakleni aoer” ta AR tetsür sepaitem mezüngbuba telok atema Officer Incharge, Major Joshi-i metetdaktsü.
Tanü agiba Attestation Parade Ceremony ji Lieutenant General H J S Sachdev PVSM,AVSM,SM,ADC, Director General Assam Rifles aser Brigadier K Narayanan, Commandant Assam Rifles Training Centre and School na lenisüba kübok ayongzüka agi.