Tetsütem Anogo nung Kanhaiya-i Smriti Irani dangi shidi ka zülu

New Delhi, May 8 (Agencies): Deobarnü JNU students union Tir, Kanhaiya Kumar-i HRD minister, Smriti Irani dangi Tetsütem Anogo tenüng nung shidi ka zülu aser iba nung kodaser tetsü kati tiyazü osang aser yanglushiba video tem nung ajemdaker pei tanurtem merenshir, ta asüngdanga lir.
Irani-i kaketshir ajakji lar tanurtem lir ta jembiba anema Kanhaiya-i la aitsüyonga arur aser pai züluba shidi nung, “onoki nü tetsü temeim angatettsü atema kanga junga shisadanger. Nü ketdangsüba kübok, onok police ajok nungi jenbua aser machimajem arema zünga aotsü angazüker,” ta zülua lir.
Kanhaiya-i shidi nungsa, Irani ji meshidangba nisung ka aser “anti-nationals” tetsü ka ta shia lir aser kaketshir ajak tenüng nung la dang Tetsütem Anogo salem metetdakja lir.
“Modi’er lenisüba kübok, asen tetsütem yutsür, asenok Mother Cow, Mother India, Mother Ganges aser Mother Smriti nunger lir, saka kodaser Rohith Vemula asü ta tanü kü medemer kati kü dang asüngdang. Ni telangzüba kecha mongutetba agi ni nü dang iba ya asüngdanger ta paisa kü dang ashi,” ta Kanhaiya-i Smriti dangi züluba shidi nungsa shia lir.
“Kasa medemsangisa kü dang, Mother Smriti’er ministry-i Rohith merenshitsü atema shidi aika yok aser ita tenet atema pa nem fellowship magütsüi sota ayu, ta ashi. India ama linük tulu ka nung, tetsü kati pei tanur soseta asütsüsa tashiyim mapa inyaktsü asü? Yanglushiba video tem aser külen tsütsü dang bushisüngdangba osang nung ajemdaker tetsü kati pei tanurtem merenshitsü temelaba agütsütsü asü? Nür tanurtem, anogo 11 tashi lumia iba tasüngdangba asüngdanger. Anungji yimlibilema telangzüba agüjang,” ta shidi nung zülua lir.
JNU nung Afzal Guru indang sentong ayongzükba dak sendakba nung university-i temerenshi agütsüba anema kaketshirtemi lumia lungkak aiter, aser tanü agi anogo 11 buba parnoki lumia arudar. Taoba hopta Kanhaiya temang mejungi akümba sülen lumiba anen aser pa AIIMS nung anepalu. Tang tashi nung kaketshir troki lumiba anenogo saka parnok 14-i maneni lumia lungkak aitdar.
Deobarnü JNU nung Tetsütem Anogo amungba nüngtem nung, campus nung alirtem den ano tema nung alir tetsütemi lumia lungkak aitba kaketshirtem pusema tanü anogo ka parnok den lumiogo. Lungkak aitba tetsütem rongnung wheel chair nung amener arishi küm 80 tain tetsü ka densema liasü.
Tang kaketshirtemi lumia lungkak aitbaji ozüngi memelaba sentong ka ta JNU VC, Jagadesh Kumar-i ashir aser pai taoba hopta kaketshirtemi ozüngi melaba inyakyim ajanga takhangbatem agütsütsü mepishia metetdaktsüogo.
Linük anema mapa inyakba ken o nung Kanhaiya den Umar Khalid aser Anirban Bhattacharya nunger apu. Iba ken o nung Kanhaiya dang sen meyirjang 10 senchi achi aser Umar, Anirban o Kashmiri kaketshir, Mujeeb Gatoo nunger ken o balala nung aija lir.