Tetsütem anogo

Americatsür Anna M.Jarvis-i tetsü kanga meim, anungji lai government dang küm nung anogo ka agiteta tetsütem nem akümtsübu agüja amongtsü atema shia liasü. Aji oda, lai bilembaji mapa küma inyaktsü atema 1908 küm May 10 nü  Anna M Jarvis-i la tetsü bilemteta amongba sentong ka ayongzüka among. Iba anogomong sentong nung adeni arur shia nem lai la tetsüi meimba naro Carnation naro agütsü. Iba anogo nungi tenzüka küm shia tetsütem anogo amongtsüba ya aikati jangraa aküm aser küm ishika tsüngda America nung yimti tulutem aika nung tetsütem anogo mongyonga ao. Iba amaji joko nisung ajaki küm shia tetsütem anogo ya kanga metsüngareta amongba ngua US tatar senden nung ozüng küma latetter külen US tir Woodrow Wilson-i 1914 küm May 9 nü tang nungi küm shia May ita nung tanabuba Deobar anogoji Tetsütem anogo asütsü ta sangdong. Iba anogo amongba ya nübortemi tetsütem nem parnok temeim asoshi akümtsübu agüja amongba anogo asütsü ta US tiri sangdong. Iba anogo nung jagi tenzüka joko US lima nung dang masü saka alima ajunga nung sobaliba tasen ka tenteta küm shia tetsütem anogo amonger aser iba anogo nung tetsü süadoker malirtemi Carnation naro temesüng amshir aser tetsü taküm alirtemi carnation naro temerem amshir. Atangji, alima nung nisung shiai pei tetsü meimtsü aser tushitsübaji kanga nüngdaker. US tir Abraham Lincoln-i pa tetsü indang jembidang, “ni kütsü sarasadem bilemtetter aser iba sarasademji kü sülen anidaker aser iba sarasadem jagi kü taküm piyong anir. Tang kü jenjang aser tarutsü teimla ajakji temeim kütsü sarasadem ajanga lir,” ta ashi. Atangji, shiba südir süang tetsü bok ajanga aru aser tebui meima anepaluka tetsü temeim tetkabo mali. Aji oda, tetsü sarasadem ajanga jala ka temenen talenba nungi Yisui salatsüba otsü ka Mathi 15:21-28 nung shia angur. Iba tetsü jagi par jalaji dang anepra ojang ta asüba tamang aser temulungtetba tulu agi Yisu bushia ao. La Yihudatsür masü bendangtsür saka lai Yisui lar jala temenen tanüla agi pua alibaji salatsütettsü ta amang. Iba tamang aser teimla nung Yisu tsüngdang ajemalua arua taremzük agi ayimtena sarasademba ajanga lar jala anep. Tanüa asenok aika pei tetsü tamang sarasadem ajanga dang tashidak tamajung nungi anepba, lendong nungi kümzükba aser timtem nungi anitetba purtem lir. Pei tetsü temang nungi asentzü sena, tekolak nung khu taret bener, teben ajak apuzüka tsük agi jang küma senteta chiyongdaktsüba ajanga asenok aika tanü jenjang balala nung anisüngzüka lir. Joko, asenokbo jenjang tajung nung alir asünungji ojalai asenok asoshi sarasademtsüba aser ojala timtema asenok mesütetba anogotemtobo amadoker, asenoka asenoksasa tain aküm ama bilema ngasangatema alitsüa akok. Nisung karibo pei tetsü agi nümamedangteter aser pei tetsü den külemi alitsübaji meinperong tulu amai bilemer. Nisung karibo pei tetsü pei kidang nungi meinzüka toktsüba otsüa lir. Ajisüaka, koba tia nung lidir liaka ojalai pei chirnur meimba temeimbo mesamar. Tanüa ojala aika pei jala jabaso temenen agi pua aliba agi amuia moutet shisabolua Tsüngrem dang sarasadema alitsü. Iba sarasadem jagi jala-jabasotem dang masü saka kinungbotem dena aneper aser tepela taküm ajangzüker. Tarutsü anogotem asoshi bilema ojalai senotsü aser chiyongtsü meyaka amshidang, asenok aikati ojala tekuro, magütsüner aser memeimer ta bilema alitsüa akok. Aji oda, tajung kümdaktsünüba agi o tetsürok agi tekümdangtsü o ashidang, ojala nisung majung ta bilema jala jabasotem aika temulung yirua alitsüa akok. Ajisüaka, ojala o tetsürokji shirang aneptsü atema mozü tajung saka tako achiba den kasa lir. Ojalai senotsü mapayu asübo aser asenoki meshitak inyakaka o tanep dang jembi asübo, temenen tanülai asenok mechiokla. Item temeim anogotem bilemteta tanü ya Ojala dang ‘Kanga Pelar,’ ‘Ni na meimer’ ta ashitsüba mapang tajungtibaji lir. Ojalai asenok dang nungi kecha meimlar, saka pai asenok tajung kümdaktsüner. Asenok tajung kümra la tepelashi. Tetsü temeimji ibaji  lir !