Lokti Teinyaktsü Shilem Ka

Tang alima nung nisung million 37.9-i teyari balaka nüngdaker, aser iba nungjagi Nagaland nunga nisung 20,000 dak tema densema lir. HIV aser AIDS indang awareness agütsütsü aser iba tashidak aketertem akokba tashi nungita yaritsü atema küm shia alima tesem ajaklen December mezüngnü World AIDS Day amonger. Iba tashidak nokdangtsü, treatment agitsü aser HIV agi shirangertem nungita yariba nung lokti teinyaktsü shilem rajemdaktsütsü nükjidong nung taküm iba anogomong ya “Ending the HIV/AIDS Epidemic: Community by Community” omen nung ajemdaker mongogo. National AIDS Control Organisation (NACO) indang HIV/AIDS Estimations 2017 report ajanga ashiba agi, India nung HIV agi shiranger nisung lakh 21 dak tema lir. Iba dak alia HIV metendanger ano nisung kwi dak iba tashidak keta alitsü ta bilemer. India nung HIV jenjang asadangra 2015 küm nungi tenzüka 2017 tashi nung temelenshi kecha balaka mangur, kechiyong 2015 küm kija nunga India nung HIV agi shiranger nisung lakh 21.17 liasü aser 2017 küm nunga nisung lakh 22.26 shi liasü. India linüki 2030 küm tashi nungbo HIV tashidak samatsütsü nükjidong yua lir, ajisüaka tang ama jenjang nungbosa iba nükjidongji mataloktsü. NACO-i ashiba agi, HIV/AIDS mesen aketer teimbaka pei kinüngbo dak nungi menabatem lir. Atangji, AIDS aketer teburtemjia tangar atema lendong, saka tetsürtem dak iba tashidak mesen aketbasa lendong taketba kümogo, kechiyong AIDS aketer tetsüri asoba tanur dak iba mesenji menaloktsütsü kanga melar. Joko küm aika nüburtem nem akokba tashi HIV indang tangatetba agüja arur, saka peisasa mekümdangba agi HIV aketer timba-timba akümer. NACO aser Nagaland State AIDS Control Society NSACS (NACO)-i asadangteta sangdongba agi, linük nung HIV agi shiranger tain timba aliba tasembuba state ji Nagaland lir (shilem 0.76), iba nungjagi shilem 91 bo shi nung medemba ajanga menazükba lir. Tang tashibo molungtet telok (NGO) aikati HIV/AIDS aketertem anepalutsü aser iba tashidak nokdangtsü atema nisung ajak nem tangatetba agüja inyakba angur. Küm 10 tejaklenbo asen lima nung HIV/AIDS indang workshop/seminar kanga bulua agia aruogo saka tanübo item ama sentong bulua agiba mangur. Item ama awareness sentong ya khen dang agir anentsüla sentong ka masü saka kümshia khenbosa agitsü junger. Asenok aikati alima nung tashidak tamajungtibaji HIV/AIDS amai bilemer, saka shidi süra HIV dang nungibo cancer tashidak kanga agi tamajungba asütsü, kechiyong cancer tashidak agibo küm 5 shi nung nisung süadoker saka HIV bo menazükba sülena karbo küm 20 tashi liteter, ano treatment shidak dang agira arshia litetter.