TGZPMC pur ‘World Environment Day’ amung

Mokokchung, June 4 (TYO): Alima tesem balala nung World Environment Day (WED) anogo ‘join the race to make better place’ omen nung ajemdaker metsünga reta amungba den külemi Tzüla (Dikhu) Green Zone Project Management Committee pura taküm agi küm trokbuba iba kasa sentongji ayongzüka Honibarnü TGZPMC kimen kidang meraketa mungogo.
Tanü iba sentong nung TGZPMC züngsemtem den ano Longsa-Ungma yimna nungi putu yimsüsürtem, Mokokchung Town nung aliba Longsa-Ungma senso telungjem aser kaketshir telungjem nungi ketdangsertem arua shilem tajung agia liasü.
Iba sentong nung TGZPMC mendenbuba C.Tia Longkumeri World Environment Day amungba teratet ashidang, WED ya 1973 küm June 5th nungi munga arur aser ibai alima ajunga nung June 5 nungi June 16 tashi nung küm shia amunger, ta metetdaktsü.
Kümshia alima tatsükba akümba asenoki angur aser angashir, aji oda, Artic aser Antartic rürjep tenem aser alima (iceberg & ice land) yimsa aor. Iba ajanga alima tatsükba akümba aser nisung aliba alijak aika atsüngbangtsü, ta paisa scientist-temi bushitetba tekümdangtsü olen ka ashi.
Tanü Longsa-Ungma TGZPMC-i ayonga WED amungba temaitsü, “pei medemer medemsor, kidanger, kiyonger aser yimeryimsanger dang, asenoki inyaktettsüba; süngdonglidong, tzübo, arem shiruru, takümsangnutem wazüka aser kümzüka ayuba denji süngdonglidong anepalua temdi”, ta Tiaisa tayongzükba ka agütsü.
“Tanü asenoki alizüng ka metongtetaka, asen chirtem, lanu asensor aser tarutsü pututem asoshi asenoki mera kar danga agia toktsütsüji kanga tongtibang lir”, ta paisa süoki ia ashi.
TGZPMC-i anepaluba wazüka ayuba tesem ya tila ka dang süaka, Mokokchung nungi Nagaland aser India nung tzü-mopung yanglushia anepaluba telok rongnung ka ta meteta tali tajungba, temerangba inyaktsü paisa ajungshia liasü.
Tanü iba kasa sentong nung Longsa-Ungma yimna nungi NBSE-i agiba HSLC tatidang nung tangar dang nungi alakteta takok angur topper nem “TGZPMC Academic Award” taküm HSLC nung Longsa nunger Wb. Züngasanen Lkr jabaso Sp. Nungsangmaneni Queen Mary Hr. Sec. School (Mokokchung) nungi top 19 ngutetba asoshi pa nem senpet nüngo kaket ka den sen 10,000/- agütsü.