Th. Muivah-i anir NSCN-IM lennirtem New Delhi-i ogo

Dimapur, April 2 (TYO) : NSCN-IM, general secretary, Th. Muivah-i anir tongti ketdangsertem Indo-Naga yimten ken o jembitsü atema Honibarnü New Delhi-i apusoa ogo.
March 31, 2017 nü Muivah-i headquarter Hebron nung 38 buba Raising Day nung aden aser iba sülen pai tongtipang senden aika jatepa amenba sülen tanü pa New Delhi-i apusoa ao.
NSCN-IM vice president, Gen Retd. Kholi bo March 31 nü New Delhi-i ogo.
Indo-Naga yimten ken o tembanga Naga nunger atema putiotsü tasen ka yanglutsü atema mapang tonga arudang, Naga nungertemi kanga dang kümdanga o jembitsü mesüra mapa inyaktsü mepishir, kechiyong itemji ajanga yimten ken o jembiba nung tetsükdaktsü bener arutsütsü akok, ta NSCN-IM-i metetdaktsü.
NSCN-i lennir ajak moatsür aser Tsüngremi parnok nem shisatsü agüjang aser anema yujang ta sarasademtsür. Ajak dang tematibaji tatembang telemtetba ka agitsü atema mapa inyakdang Tsüngremi lennirtem len anitsü asoshi sarasademtsür, ta MIP sangdong ka nung metetdaktsü.
NSCN-i Naga nunger ajak tenüng nung Naga nunger atema tajungtiba asoshi inyaker aser Naga nungeri maginütsüsa telemtetba magitsü. Anungji, Nagalim nung aliba Naga nunger ajaki maneni sarasademtsütsü aser pusema nungittsü mepishia metetdaktsür, ta sangdong nungsa shia lir.