Thai nunger prangpong-injang ayoker Wuthikorn India-i anir arur

New Delhi, December 08 (Agencies): Prangpong-injang shibelenba dak sentakba nung Bangkok court ka ajanga Thailand nunger arms ayoker, Wuthikorn Narunartwanich (Willy) anema India nung obendangtsü asoshi benzüka agütsüogo, ta National Investigation Agency (NIA) nung DG Sharad Kumar-i osang tejangja metetdaktsüogo.
India aser Thailand na tsüngda tai aketer bendanga agütsütepa inyakyim ya tan mezüng lir, ta shisem.
Wuthikorn ya bendang linük nungi prangpong aser injang aika ozüng alema shibelenba aser North East nung aliba telungpur nem raradang amshiba oset shibelentsüba atema aija lir.
Tang pa NIA ket nung lir aser Mongulbar aonung India tonga anir arutsü.
“Iba ken o ya ozüng alema prangpong aser injang ayuba atema lir aser kasa telatetba dak ajemdaker NSCN (IM) telok nung tongtibang nisung, Anthony Shimray-a NIA-i apu,” ta NIA sangdong ka ajanga metetdaktsü.
“Anthony Shimray-i sen million dollar 1.2 alang prangpong aser injang alitsü asoshi Wuthikorn den aiben jembishinüa liasü. Ibaji asoshi Anthony-i Wuthikorn nem sen dollar 800,000 agütsüogo,” ta kasa sangdong nungsa shia lir.
March 23, 2011 nü NIA-i Anthony Shimrey anema Indian Penal Code (IPC) arrla 120B, 121A, 122 aser 16, 17, 18 den UA (P) Act, 20 kübok ken o benoka liasü.
Anthony Shimray ya tang tepuokdak yua lir aser NIA court Delhi nung pa indang ken o angadangdar.