Thai okadaki prangpong-injang shishilembar ka India-i anir aotsü melar

Bangkok, November 4 (Agencies) : Thailand nung Appeals Court kati Thai nunger prangpong-injang shishilembar ka India-i anir aotsü atema temelaba agütsüogo.
Iba nisung yagi Chinese suppliers aser India kübok Northeast nung telungpur teloktem asoshi tiyongtsü nung mapa inyakba atema India nung pa anema ken o benoka lir.
Iba nisung ya Wuthikorn Naruenartwanich (Willy Naru) lir aser pa ya India-i mepishiba nung ajemdaker August, 2013 nung apu.
Chinese suppliers aser Nationalist Socialist Council of Nagaland (NSCN-IM) nung tongti ketdangser Anthony Shimray tsüngda Willy-i tiyongtsü nung mapa inyak ta India aija-i Thailand dang pa aputsü mepishia asüngdang.
Shimray ya October 2010 nung Indo-Nepal arrtsü anasa apu aser pai ashiba agi USD 1.2 million jenjang prangpong-injang alizükba nung Willy-i pa yari.
Indian intelligence-i tena tongtepratepba bushitepa ao aser tenati email ajanga prangpong-injang alizüktsü jembitep aser USD 8,00,000 bo agütsür liasü ta buhitet.
Arishi küm 57 tain Willy ya Thailand nung spa business inyaker aser iba ya pai ozüng alema mapa inyakba miimbangtsü atema lir ta temulung melemi bilemer.
“Okadaki pa anogo 90 tsüngda India-i anir aotsü tetuyuba agütsüogo, saka onoki ita ka tsüngda nung pa anir aotsü imlar” ta osang ka ajanga metetdaktsü.