Thai police-i Bangkok nung bomb pokdaktsür noksa sayu

Bangkok, August 19 (Agencies) : Bodbarnü Thai police-i Bangkok yimti nung nisung 20 poksetba tatalokba atema tongti süa tai tongloktsür ka indang noksa sayuogo.

Police-i sayuba noksa nung tebur ka tenük aina khaloker lir saka iba nisung ya Thai nunger mesüra bendanger arr mejangjateter.

Mongulbarnü Bangkok kübok Ratchaprasong commercial district nung police-i closed-circuit television (CCTV) footage indang video ka nung tebur ka wakong sentsü tola ka semer sayu.

CCTV footage nung sayuba video nungji tebursang jagi backpack ka bener arua tekülem ki nung yutsür aoer aser iba sülen minute ishika dang lir bomb apoker.

Iba nisung dak temulung malemer saka ano iba bomb pokdaktsüba nung tangartem dena alitsü, ta Thai police-i metetdaktsü.

Tanü sayuba noksa nung aliba nisungji ngutetra, CCTV footage nung wakong sentsü tola asemba nisungji aputsü akok. Iba nisung pua arutsü atema osang tejangja sangoktsür nem sen 1 million baht ($28,000) senpet agütsütsü ta police-i metetdaktsü.

Police tanishir Somyot Pumpanmuang-i osangbener den sensaksemdang iba mapa nung nisung kwikati shilem agi mejangja ta ashi.

Paisa ashiba agi, lendong atalokba sülen parnoki nisung ana-asem ka dang asüngdangyaogo.