Thailand chuba tasenbai nüburtem dang tan mezüng tejak sayu

Bangkok, December 4 (Agencies) : October 13, 2016 nü Thailand chuba Bhumibol Adulyadej asüba sülen Hokolbarnü par jabaso aser Thailand chuba tasenbai pa chuba mendeni atuba metetdakja nüburtem dang tan mezüngsüa tejak sayuogo.
Arishi küm 64 tain, chuba Maha Vajiralongkorn Bodindradebayavarangkun-a Bangkok Grand Palace nung tebu sür anogo 50 ajungba mung nung arua aden.
Chuba tasenba arudang sorkar mapa inyakertema official mangyim mapang asemba süoshi, sentsü tanak aser temesüng sobur lenmang tezülen nokdaka liasü.
Chuba Maha Vajiralongkorn-i tebu asüba sülen pa chuba medeni atutsü atema mapang tera agitsü ta shia chuba menden hopta 7 tashi tazüng yütsüba ajanga nüburtem kanga aoksaa liasü.
Pa chuba mendeni atuba sentongji tatsüka tang agi aser iba sentong Brihostibarnü TV nunga sayuogo. Pa chuba mendeni atuba sülen 2014 küm nungi aliba general tem den tesendaktep kechi koma yutetdir ta ajaki kanga süngmanga atadar.
Military yimsüsüba aruba sülen nungi rongsenkettsüng aser yimsüsüba tsütsü terenlok khenyongi mali kümogo.
Mongintemi ashiba agi, military-i yanglua aliba temzüng mapa küma amshitsü atema chuba indang stamp nungdaktsü, ibaji ajanga parnok ka kümer otettsü.
“Temzüng tasen den Chuba tasenba aruba sülen lokti ajak liromedem akümtsü,” ta ING, Singapore nung Asia atema chief economist, Tim Condon-i ashi.