Thailand chubai temzüng yanglushitsü atema parliament nungi temelaba nguogo

Bangkok, January 13 (Agencies) : Hokolbarnü Thailand parliament-i linük chuba Vajiralongkorn-i mepishiba anga linük temzüng yanglushitsü temelaba agütsüogo. Iba temepishiba ya yaküm August ita nung agüja liasü aser tang yimsü tesüdak military teloki ibaji taküm nungi melenshia amshiner.
Parliament inyakyim ka ajanga chubai benokba temepishibaji vote 228 agi koka liasü, ta Efe osang ajanga metetdaktsü.
Linük temzüng kechiba melenshir ibaji sorkar aser chuba nunger shingaia rateta memetetdaktsü.
Chubai pa aieni aoba mapang pa melena nisung shima yutsüba inyakyim melenshiner, ta ketdangser kati ashi.
Ato Kilonser aser Thai military junta nung tekolakba Prayut Chan-ocha nati, linük temzüng yanglushiba ajanga nüburtem temeden aser nüji meraksatsütsü. Chuba bangdangpur atema dang temelenshi akatsü, ta tan hopta tetenzüklen metetdaktsüogo.
Chuba bangdakpur atema temzüng ozüng yanglushitsü atema temepishiba ya agütsüba sülen temzüng nung aliba ama anogo 90 nü asadanger külen Feburary 6, 2017 nü mapa akümtsü.
Linük nung taküm küm tatemlen election agitsü lia iba temzüng ya military junta temi linük nung tanaben democracy bener arutsü nükjidong nung melenshirba lir.
Iba temepishiba ya junta-i shimtetba, nisung 21 agi akümba teloki zülu aser iba temelenshi ajanga election nung adoka akümba sorkar tashi dang nungi military tashi tuluba alitsü.
1932 küm chuba yimli meshimeshia anenba sülen linük nung tan agi temzüng 20ben buba yanglushir asütsü.