Thailand election 2017 nung agitsü akok: Wissanu

Bangkok, September 16 (Agencies): Thailand nung election sentong 2017 küm June ita jakdang agitsü sentong renemba osang ka tang Thailand indang yimsüsütsü tashi benoka aliba mitkar junta-i tanü Bodbar nü metetdaktsüogo.

Taoba Thailand Ato Kilonser, Yingluck Shinawatra yimtsütsü menden nungi tashiyim agi anentsüba sülen yimsüsütsü tashi tashiyim agi benoker, mitkar junta-i nübur lenirtemi tentetba sorkar ita 18 tsüngda nung tentettsütsü nangzük saka parnoki nangzükba ama tanü tashi mapa küma inyaka mali.

Junta lenirtemi par linük temzüng tanaben yanglushitsü maparen tenzüka election agitsü mapangji atsülangshija kasaji taruba 2016 küm tetenzüklen agitsü renemshi saka junta-isa tentetba mitkar ludeni linük temzüng tasen küma yanglushiba onükji magizüki election agitsü mapang anosa atsünglangshir lir.

“Thailand linük temzüng tasen küma yanglushitsü maparenji ita 20 shi agitsü akok,” ta Thailand Deputy Prime Minister, Wissanu Krea-ngam-i tanü Bangkok nung osangbener den ajurutepdang metetdaktsü.

“Linük temzüng tasenba latetba sülen 2017 küm June ita tashi nung Thailand-i general election sentong agitsü akok aser election-ji agir ita ka lir külen Thailand sorkar tasenba tentettsü,” ta pai ashi.

Ano külen, par linük temzüng yanglushitsü maparenji tekaraba mapang nung inyaktsü tetuyuba ka Thailand Tir, General Prayut Chan-O-Cha-ia agütsüba olen ka par Foreign Minister, Don Pramudwinai-ia metetdaktsüogo.