Thailand-i ozüng alemba shibelenba shitypu ton 2 dak tema raksa endoker

 

Bangkok, August 26 (Agencies): Thailand-i ozüng alema shibelener ket nungi bena aruba Dollar sen million 2.8 shi jenjang aketba shitypu tanü Bodbar nü raksa endokogo.

Shitypu aser shitypu agi yangluba osettsüset seret ton 2.2 shi taretji lung menüngsaba kol amshia raksa endokba osang jangjaogo.

“Shity ya ozü linük maitsü lir saka rongsen tajangzük angutsü merangertemi shity tepseta shity indang tepu ozüng alema shibelenba ajanga ozü linük nung shity malitsüsa jenjang tamajung bener arutsür,” ta Thailand Ato Kilonser, Prayut Chan Ocha-i tanü metetdaktsü.

“Ozüng alema shitypu shibelenba maparen ya nokdanga azüoktsü asoshi ozü sorkari lemtetogo aser aibelener nem temerenshi tulu agütsütsü renema lir,” ta pai ashi.

“Thailand sorkari ozüng alema shitypu shibelenba maparen nokdangtsü tenzükba atema kanga pelar. Ozüng alema shitypu shibelenbaren nokdangtsüji kanga dang tongtipang lir,” ta Convention on International Trade in Endangered Species of Wild Fauna & Flora (Cities) nung Secretary General, John Scanlon-ia metetdaktsü.

Shity mesürtemi parnoki mesüba shity dak adenba shitypu den sentakba osang sorkar den benoktsü asoshi Thailand sorkari Elephant Ivory Act temzüng taküm küm tetenzüklen latetba sülen shity mesür Thailand senso 44,000 shi ozüngi tuyuba ama inyak aser shitypu seret ton 220 shi shity mesürtem ket nung aliba osang sorkari tang nguteta lir.

CITES temzüng kübok Thailand-i taoba mapang, 1989 nungi tenzüka shitypu yokyayokshibaren nokdanga lir.