Thailand ketdangsertemi constitution tasenba magizüker

Bangkok, September 6, 2015: Thailand National Reform Council, linük temzüng tasenba magi asoshi vote agitepba sülen nokdakba noksa nung angur. Vote agiba mapang council züngsem 7 medentet.

Bangkok, September 06 (Agencies):Deobar nü Thailand nung military-i shimba National Reform Council-i yaküm latetba mangatettep aliba linük temzüng tasenba magizükba ajanga linük nung democracy amenoktsü menur.
National Reform Council nung züngsem 247 lir aser parnoki rongnung züngsem 135-i iba temzüng magitsü atema vote süa liasü. Vote agiba mapang council züngsem 7 medentet.
Iba temzüng magitsü ta timba kati vote asüba ajanga National Reform Council kümsük tembangadokogo aser linük temzüng latettsü asoshi tentet tasen ka shimtsü. Iba sülen temzüng tasen latetshitsü asoshi parnoki nem anogo 180 ang mapang agütsü.
Tentet tasenbai parnok mapa temer külen ita pezü lir külen temzüng tasenbaji nüburtem nem metetdaktsütsü aser parnok tebilemba lemsatepdaktsütsü.
Yaküm linük temzüng nung Ato Kilonser Yingluck Shinawatra tetsükdak kar aluba sülen military-i iba temzüng anendaktsü aser sorkari khen asoshi lemtetba linük temzüng ka ajanga linük ania liasü.
Iba sülen junta-i nisung 247 agi akümba ‘National Reform Council’ shima linük asoshi temzüng tasen ka yanglu.
Temzüng tasen ka melatet tashi military sorkari parnok tashi nung linük yimsüsüa atatsü koba ajanga linük nung democracy agi anünga akümtsü.
Sorkari, linük nung election 2016 küm tiyonglen agitsü, ta taoba mapang shia liasü, ajisüaka teshisadangertemi, iba election ya 2017 küm ang agitsü südi, ta ashir.
Taoba hopta NRC züngsemtemi tali jushiba ajanga iba temzüng magitettsüsa aküm, ta Bangkok Post-i metetdaktsü.
Iba temzüng atema vote agitepba mapang council züngsem ajak tenüng teta jateta vote südakja liasü.