Thailand linük temzüng tasenba renemtsü asoshi luden tasen ka shimmer

Bangkok, October 05 (Agencies): Tang Thailand madak yimsü süa aliba mitkar sorkari par linük temzüng tasenba renemtsü asoshi luden tasen ka shimogo.

Thailand mitkar lenirtemi par linük indang yimsüsütsü tashi tashiyim agi agiba sülen linük temzüng tasen ka renemdang saka nüburtemi kasaji magizükba ajanga par linüki election sentong agia sorkar tasen tentettsü mapatong tekaraba agi 2017 küm tashi nung ang agitettsüsa tang tensa ajurua lir.

“Tan shimba züngsem 21 densemba ludeni asüng, Mongolbar nü nungi tenzüka taruba ita 6 tashi nung par linük temzüng tasenbaji renemtsü asoshi mapang agütsüogo,” ta Thailand Deputy Prime Minister, Visanu Krua-ngam-i tanü metetdaktsü.

Linük temzüng tasenbaji Thailand yimsüsürtemi agizükba sülen kasaji agizüka benshitsü lemtettsü asoshi par nüburtem rong nung vote agitsü sentong renema lir ta pai ashi.

Tesüiba Thailand Ato Kilonser, Thaksin Shinawatra Ato Kilonser menden nungi tashiyim agi 2006 küm atsüngdokba sülen tesangküm, 2007 nung renemba linük temzüng renemtsü maparen nung tongti shilem agir, Meechai Ruchupan tan tentetba Constitution Drafting Committee mendenbuba shimba osanga jangjaogo.

Thailand mitkar junta lenirtemi Thaksin tenu, Yingluck Shinawatra-a May, 2014 nung Ato Kilonser menden nungi tashiyim agi atsüngdoker Thailand indang yimsüsütsü tashi benoka liasü.