Thailand nung asür King Bhumibol den tepila sentong agir

Bangkok, October 25 (Agencies): Arishi küm 88 lia taoba küm October ita asüsang aser Thailand chuba, Bhumibol Adulyadej den anogo pongu tepila sentep agitsü asoshi müburtem adenshi tenzükogo.
Yimsüsür temang ya Bangkok nung Brehostibarnü aremtsü.
Adukyadej temang aremtsü asoshi Grand Palace anasa ki tulu ka asüba nung küm ka junga agi.
Linük yimden yimsüsüba tsütsü mangatettep adoka mitkar tashi amshia yimden anaben atsüngdokba mapang Adukyadej ya yimjung yanglur nisung ka ama liasü.
Buddhist tamangba yimsü nung iba tepila setong agidang Thailand linük ajunga nungi nisung 250,000 arua adentsü südi, ta osang ajanga ashi.
Nisung aika iba asüpila sentong nung adentsü asoshi jelia arua atsükokdak tesem yanglua atar.
“Iba tesemi ni anogo ana jelia aru, ibayongji dang ni tesem tajung angutsü,” ta northern Thailand nungi arishi küm 72 tain tetsür kati osangbener dang ashi.
Bodharnü Grand Palace telung nung iba asü pila sentong agi tenzük. Brehostibarnü temang aremba mapang Adulyadej’er jabaso King Maha Vajiralongkorn-i tasümang arungba nung mi senloktsütsü.
Iba sülem Bhumibol Adulyadej indang mitsü ya bendener chuba’er kidangi Hokulbarnü bener aotsü aser iba sülen anogo ana mangyimba anogo alitsü.
Chuba’er kinungertem den iba asükhu lemsateptsü asoshi linük 40 dak tali nungi tongtibang noisungtem arua iba asü pila sentong nung adentsü.