Thailand o Cambodia nati tongti rongsenren tezüngzüktep agir

Bangkok, December 20 (Agencies): Thailand o Cambodia nati rongsenren, shishilembatsü aser linük kümzüka ayutsü tezüngzüktep ishika zülutepa yashi Honibar nü agiogo.
Küm aika tesendaktep mejungi aruru külen tesendaktep tanabuba tajungba küma yanglushitsü tenzükba sülen Cambodia Ato Kilonser, Hun Sen-i tan Thailand semdangdang iba tezüngzüktepji agia liasü.
Sen-i tan Thailand semdangba sülen pa küm 12 nung Thailand semdanger mezüngbuba Cambodia Ato Kilonser kümogo.
“Thailand aser Cambodia na tsüngda tesendaktep tajungba küma yanglushiba ajanga ozü linük anapronglai tajangzük angutsü alizüng yua lir,” ta Thailand Ato Kilonser, Prayut Chan-o-cha den ajurutepa sülen Sen-i metetdaktsü.
“Tang Thailand aser Cambodia na tsüngda tesendaktep kanga junga yanglua lir,” ta Prayut-ia metetdaktsü.
Par linük anati tan tezüngzüktep agiba sülen tarutsü mapang, 2020 tashi nung par shishilembabaren jenjang asemsü agi tajungba kümdaktsütsü alizüng yuogo.
Prayut den ajurutepba jakdang, Sen-i Thailand & Cambodia Bussiness forum ka nung shilem agia liasü.
Tan Thailand aser Cambodia na tsüngda rongsenren aser shishilembatsü tezüngzüktep agiba ajanga Thailand nung jenoka alir Cambodia nunger ayangertemi Thailand’er rongsenren jenjang tajungba kümdaktsütsü shilem nung tongti shilem agiba kuli angur ta Thammasat University nung economist, Pavida Pananond-ia metetdaktsüogo.
“Thailand’er rongsenren maparen nung tongti shilem agir tarensen nung Cambodia nüburtem tanabuba jenjang nung lir. Anungji, tan tezüngzüktep agiba ajanga ozü linük ana tsüngda tesendaktep tajungba akümer ta kuli tejangja sayur,” ta pai shisem.
Cambodia-i Prasat Preah Vihea aser Thailand-i Preah Vihear ta ajaba 9 buba putu nung yangluba Hindu tekülemki den sentakba mangatettep ken o adokba sülen Thailand aser Cambodia linük na tsüngda küm 10 dak tema tesendaktep mejungi aruba sülen küm ishika tejaklen nungi tenzüka par linük ana tsüngda tesendaktep tanaben tajungba küma yanglushitsü tenzüka lir.
Linük ana mitkartemi 2008 nungi 2011 tashi arrtsülen tongpanga raraba sülen International Court of Justice-i par linük ana tsüngda adokba mangatettep ken o ji bentettsü.