Thailand tzümetsüng nung nisung 11 asüba jangjaogo

Bangkok, January 07 (Agencies) : Thailand anüolentip tsütsü tzümetsüngba lendong nung asür nisung 11 tashi kümogo, ta linük Crisis Prevention Centre-i metetdaktsüogo.
Tzünglu maneni aluba ajanga nisung 744,000 dak kongshiogo aser Honibar tashi nung province 11 tashi tzü agi metsüngbanga lir ta jangjaogo, ta kasa osang ajanga metetdaktsü.
Iba lendong ya disaster management level 3buba lir ta ketdangsertemi Hokolbarnü metetdaktsü aser iba tebilemtsü ya provincial level nungi national nem nüngloka yutsüogo.
Iba ama lendong kanga tashii arudang level 4 sangdonger aser iba level ji 2011 küm tzümetsüng ajanga nisung million 13.6 dak kongshia nisung 815 tashi asüba mapang metetdakja liasü, ta crisis ketdangsertemi ashi.
Hokolbarnü Nakhon Si Thammarat province nung aliba resort ka nung tzümetsüng agi kongshiba mapang police temi raliwalir nisung pungu kümzüka lir.
Nisung ana Finland nungi, ka Germany nungi aser ana Thailand nungi liasü, ta Thailand osangkaket ‘The Nation’ ajanga metetdaktsü.
Raliwalirtemi kanga sapuba Koh Samui asetkong nunga tzünglu kang tesashi alua tzüsem tesashi agi kongshi.
Osang tasen memetetdaktsü tashi Koh Samui tzükümtem nung tzü awatsü aser tzü nung amshiba garitem mamshitsü metetdaktsüogo, ta Tourism Authority of Thailand-i dpa dang ashi.
Iba lendong agi kongshir alirtem kümzüktsü atema tekümzükertemi kanga meranga inyaktepdar. Police aser army ketdangsertema tzümetsüng agi kongshir alirtem nem nüngdakba oset aser chiyungtsü agütsütsü atema mapa lemzüktsüogo, ta kasa osang ajanga metetdaktsü.