Thailand:Exhibition sentong nung pilot ka asü

Bangkok, January 14 (Agencies) : Honibarnü Thailand kübok Songkhla province nung Children’s Day exhibition sentong ka nung shilem agiba tayimtsü ka tsükoka pilot ka asü.
Sweden nung yangluba Saab 39 Gripen fighter aircraft ya raraba yimya ka ia sayuba sülen Hat Yai tayimtsü anenba tesem nung tayimtsü yimketba lenmang nung tsükok, ta Bangkok Post osang ajanga ashi.
Iba tayimtsü tsükokba tesem nung mi adok nunga inseptsü asoshi mi insepba gari ka yok aser iba lendong atalokba ajanga tayimtsü aika marudaktsüi liasü.
Thailand Ato Kilonser aser military junta nung takolakba, Prayut Chan-ocha nati asür pilot Dilokrit Pattavee’er kinungertem den asükhu lemsatepogo.
1955 küm nungi Thailand nung Children’s Day ya January ita tanabuba Deobar anügo nung munga arur. Iba anogo nung tanurtemi sorkar headquarters, parliament, natural parks aser military barracks tem semdanger. Iba den külemi parnoki kenten sentong aser lenmang nung jelushi aier.