Thanamir nung 8buba Thanamir Apple festival agi

Kohima, Rongjui/September 13 (TYO): Thanamir Village Council aser Department of Horticulture nati senteper September 13, 2019 nü public ground, Thanamir nung 8buba Thanamir Apple festival ayongzüka agiogo; iba sentong nung tetushi tejaokerji Horticulture & Border Affairs Advisor, Mhathung Yanthan liasü, ta ketdangsertem osang ka ajanga metetdaktsü.
Iba sentong nung jembidang Yanthan-i, Tsüngremi Thanamir ya balaka yanglu aser yangi nüburtem nem ali nungi adokba rongsen moaja lir, ta ashi.
Paisa yangji alirtem aser kishikina yimtem dang apple timba züsentettsü atema mera balala agia inyaktsü ajungshi.
Paisa yimdaklirtem dang rongsenkettsüng jenjang ajungtsü aser temang tajangzük atema aluyimba ajungkettsütsü ajungshi.
Paisa, aluyimertem nem apple metsüh tapet agütsütsü atema department-i yaritsü, koba ajanga iba süngjang jenti züsenteta Nagaland nung nüburtem rongsenkettsüng ajungkettsü, ta ashi.
Kasa sentong nung IPR, SCERT & Village Guard Advisor, Toshi Wangtung-i, arem wazüka ayutsüla, kechiyong süngdong alenba ajanga tsüngsang mopung tamajungba küma apple tsünüba nung kongshiba dang masü saka meimchirtema lenmang balala nung aoksatsü, ta ashi.
Yimchungru Tribal Council (YTC) President, Throngso-i, apple ya alima tesem ajungalen masü saka tesem kar nungang tapet, anungji aluyimertemi kanga nendaka iba lu ayimtsüla, ta shia iba süngjang taliba züsenteta taruba kümtem nunga iba festival amongtsü ayongzük.