Thane nung kinü tanur ayokba tesem ka ngutet

Thane, September 26 (Agencies): Police temi Thane yimti nung kinü tanur ayokba tesem ka nguteta iba tesem nungi tetsür trok densema nisung ti puogo, ta ketdangsertemi Mongulbarnü ashi.
Osang angashiba sülen Thane police indang crime unite-I-i Mulund Check Naka anasa aliba hotel ka Deobar nikongdang mita ata.
Iba mapang tebur ka aser tetsür ka teka nung kinü tanur ita ka majung tebur ka amer temolung melemtettsüsa aruba itdangitertemi angu, ta senior police inspector Nitin Thacker-i ashi.
Police temi nisung ana ji pua tena tenüng aser kinü tanur indang asüngdang, saka tenati telangzüba junga magütsütet, ta police tanishiri ashi.
Police-i iba nisung ana ya pur asüngdangya asüba mapang iba tanur ya Mumbai nung nisung ka dang sen lakh 1.35 agi ayoktsü aru, ta tenati ashi, ta Thacker-i shisem.
Police-i maneni asüngdangyaba mapang, tamalena Ahmednagar district nungi nisung ana Thane nung aliba Mumbra jilai tanur ayoktsü asoshi aru, ta ashi.
Item nisungtemi Mumbra nung tetsür ana nem agütsüba tanur ya Mumbai nung ayoktsü asoshi la nem agütsü, ta police temi pua aliba tetsürlai ashi.
Iba tetsürlai agütsüba kuli nung ajemdaker police temi Thane nung aliba Mumbra railway station anasa tetsür pongu aser tebur ka Deobar aonung apu, ta Thacker-i ashi.
Iba sülen parnok ti prongla ya police temi pua ayu.
Parnok nisung ti ya IPC section 361 (ozüng agi mela aliba kinunger ket nungi tashiyim agi pua bener aoba), 365 (metetsümonga miimshia aser tai makaba nung nisung pua ayuba), 368 (tashiyim agi pua aliba nisung anidenba) aser 372 (teküp ayokba maparen atema tanur ayokba) amala temzüng aser Juvenile Justice (Care & Protection of Children) Act kübok pua yua lir, ta police ketdangseri ashi.
Iba mapang ngutetba kinü tanur ya Thane nung tanurtem anepaluba centre dangi yokogo, ta Thacker-isa shisem.