Thangi Mannen-i Mokokchung nung ‘Milk Products Unit’ lapoktsü

Commissioner & Secretary, Veterinary & Animal Husbandry, L.H Thangi Mannen-i Mokokchung nung Mini Dairy Plant & Milk Products Unit sayatsüba sülen agiba noksa angur.

Dimapur, December 11 (TYO) : December 11, 2015 nü Commissioner & Secretary, Veterinary & Animal Husbandry, L.H Thangi Mannen-i Mokokchung nung ‘Strengthening of Mini Dairy Plant & Milk Products Unit’ lapoktsüogo.

Dairy plant & Milk Products Unit ya Nagaland State Dairy Co-operative Federation Ltd. (NSDCF) aser Nagaland Livestock Development Board (NLDB) nati teyari agütsür aser December 12, 2015 nü Mokokchung jila küm 125 ajungba benjungmung tenzüktsü anogo ka jelia iba ya lapoktsüogo.

Milk products Unit tenzüktsüba den tang aliba dairy plant tashi itshiba ajanga department-i mapa tila ka tenzüktsür saka iba yagi kobi melii district nung rongsenkettsüng tashi itdaktsütsü, ta tanü Thangi Mannen-i o jembidang ashi.

Department-i Milk Plant jenjang yanglushitsü aser Mokokchung ya tesem tajung ka asünung tanga district tem nunga milk products belenshitsü takoktsü lir, ta laisa ashi.

Thangi Mannen-isa Mokokchung nung alirtem saksalemtsü aser rongsenkettsüng jenjang tajungba kümdaktsütsü ayongzük.

Sentong nung Mokokchung DC, Sushil Kumar Patel-ia o jembidang ashiba agi, 2040 tashi nung Mokokchung alizüng ayuba nung ‘milk products’ ajungkettsüba ya shilem ka asütsü.

Veterinary & Animal Husbandry department-i jila küm 125 ajungba benjung amungtsü lia Milk Products Unit lapoktsüba atema kanga pelar aser iba ya Mokokchung atema dang masü saka anameta aliba district tem atema tajangzük asütsü, ta Sushil Kumar-isa metetdaktsü.

Iba sentong nung mendenji Additional Director V & A H Dr. N. Rongsen liasü aser Additional Director, Dr Viral. Joint Secretary, V.A H Temsunaro-ia o tatsüka jembi. Sentong nung Kohima aser Mokokchung nungi Department ketdangsertem den Salangtem Ward nungi lennirtem aden.